Ligongo cici ŵanduŵa akuwoneka ŵakusangalala mnope? Jemanjaji ali pa msongano wetu wekulungwa. Mpela mwaŵatendelaga ŵakutumicila Mlungu ŵakala, ŵaŵasalile kuti asonganeje katatu pacaka, m’weji tukusasonganasoni yimpepe m’makuga gekulungwa. (Deuteronomo 16:16) Caka cilicose, tukusakolaga misongano jekulungwa jitatu mpela: Lisiku lya msongano wapajika, msongano wamkuli wamasiku gaŵili, soni msongano waupande wa masiku gatatu. Ana misongano jekulungwaji jikusatukamucisya catuli?

Jikusalimbikasya unasi wetu wa pacilambo cosope. Mpela mwayaŵelele kala kuti Ayisalayeli ŵamlumbaga Yehofa “pamisongano,” nombe m’weji tukusasangalala kumlumba Mlungu payakutendekwa yapajika. (Masalimo 26:12; 111:1) Misongano jekulungwaji jikusatupa upile wakusimana, soni kukunguluka ni Mboni syakutyocela ku mipingo jine atamosesoni yilambo yine. Pandaŵi ja musi, tukusalyaga cakulya pamalo ga msongano, yayikusajonjecesya kuti gaŵeje malo gakusangalasya ga yakutendekwa ya usimu. (Masengo 2:42) Pamisonganoji tukusakuwona kunonyelana kwakukusakamulanya “likuga lyosope lya abale” pacilambo cosope.—1 Petulo 2:17.

Jikusatukamucisya kwawula m’bujo mwausimu. Ayisalayeli ŵapataga umbone ligongo lyakuti “ŵapikanicisye maloŵe” ga Malemba gaŵatagulile. (Nehemiya 8:8, 12) Maloŵe gakutukamucisya ga m’Baibulo gatukusapocela pamisongano jekulungwa gakusaŵa gakusosekwa mnope kwa m’weji. Pologalamu jilijose jikusakola mtwe wakutyocela m’Malemba. Kupitila mu ngani, ngani syakulecelana, kulosya yayatendekwe, tukusalijiganya kutenda lisosa lya Mlungu pa umi wetu. Tukusapata macili patupikene yayikwatendecela ŵane, soni yakutenda pakusaka kumalana ni yakusawusya yakwika ligongo lyakuŵa Aklistu mu ndaŵi jakusawusyaji. Pamisongano jaupande, maseŵelo gakusatukamucisya kusiwona ngani sya m’Baibulo kuŵa sisyesyene, soni tukusalijiganya yindu yakutukamucisya. Pamsongano uliwose, pakusatendekwa ubatiso wa ŵandu ŵalosisye kulipeleka kwawo kwa Mlungu.

• Ligongo cici misongano jikusaŵa ndaŵi jakusangalasya?

• Ana ligongo cici wawojo akusosekwa kusimanikwaga pamisongano?