Ñee maʼ biiyaluʼ pabiáʼ nayecheʼ nuu ca binni ni rihuinni raríʼ la? Ca binni riʼ nuucabe ra cayaca tobi de ca guendaridagulisaa roʼ ni rápadu. Dios biʼniʼ mandar ca xpinni ni bibani dxiqué guidagulisaacaʼ chonna biaje lu ti iza, laadu laaca rúnidu zacá ne nabé riéchedu ora guidagulisaanedu stale xpinni Cristu (Deuteronomio 16:16). Ca guendaridagulisaa ni rápadu lu ti iza nga: chupa asamblea de circuito ni rindaa ti dxi ne ti asamblea regional ni rindaa chonna gubidxa. Xi ribeendudu ora riuudu cani yaʼ.

Racanécani chuʼ ca xpinni Cristu tobi si. Nabé biecheʼ ca israelita gusisácacaʼ Jiobá «lu ca guendaridagulisaa roʼ», ne laadu laaca riéchedu stale nga guni adorardu laabe ora raca ca guendaridagulisaa roʼ riʼ, purtiʼ racá nga ridxaagadu xcaadxi xpinni Cristu (Salmo 26:12, nota; 111:1). Ca guendaridagulisaa ca racanécani laadu guidxaagadu xcaadxi Testigu ni nuu ndaaniʼ xcaadxi neza binni ridagulisaa ne de xcaadxi guidxi. Biaʼ galaa dxi ca ridoʼdo gueta juntu lugar ra raca cani, nga racané laadu chuʼdu jma nayecheʼ lugar ra cayuni adorardu Dios (Hechos 2:46). Lu ca guendaridagulisaa ca nga ridúʼyadu pabiáʼ rannaxhiisaa «irá ca hermanu» stidu ni nuu lu guidubi naca Guidxilayú (1 Pedro 2:17).

Racaneni guizíʼdidu jma de Dios. Ca israelita que guleenducabe stale ni galán ora «biénecabe ca diidxaʼ» ni biziidicabe de lu Stiidxaʼ Dios (Nehemías 8:8, 12). Zacaca nga rúnidu, rusisácadu cani rusiidicabe laadu lu ca guendaridagulisaa roʼ riʼ. Ne lu cada tobi de laacani rusiénecabe de xiixa tema ni zeeda lu Biblia. Lúcani ridiʼdiʼ libana ne nuu tiru ridiʼdiʼ chupa chonna xpinni Cristu ni ruluíʼ ximodo gúnidu ni na Dios. Laaca nabé riguucabe gana laadu ora ruzeetecabe ximodo huadxiilú xcaadxi Testigu ca guendanagana ni huayápacaʼ lu ca dxi nagana riʼ pur nácacaʼ xpinni Cristu. Lu ca asamblea regional ca rutiidicabe ximodo guca xiixa historia zeeda lu Biblia, ne cani ridiʼdiʼ luni rácucaʼ lari casi gucu binni dxiqué ti ganda guiénedu ca relatu ca ne guidúʼyadu paraa zanda gacanécani laadu. Lu guiráʼ guendaridagulisaa rápadu riuunisa ca binni ni racalaʼdxiʼ gusihuinni maʼ bidii laa Dios.

• Xiñee nabé nayecheʼ runi sentirdu ora riuudu ca guendaridagulisaa roʼ ni rápadu.

• Xi zabeenduluʼ pa cheluʼ tobi de ca guendaridagulisaa roʼ stidu.