Penaro watï tïromoʼtopotapa Jesas tïka ma: ‹Ènï yopotomarï poko moro juʼpïn ouranano ekarichataʼton ijomboro tïponone nono weíʼpio ta ijomboro weʼchoʼkonʼwa etapotoʼme, ijombo te moro iʼmiatïrïpïa kïnosan.› (Matthew 24:14) Neiara katu ènï nono wararo wòrupïano emamin arororïpïa na? Nono kuʼpo tïaʼta Jesas weíʼmiaʼpombo paʼme weinio yako.​—Luke 8:1.

Amukon epotoʼme èʼtïkonʼwa naʼna kïnïsan. Oʼto wararo yòrupïarïkon poko Jesasʼwa tïpïoʼchorïkon tòmepaʼmainie mandon. (Matthew 10:11-13; Acts 5:42; 20:20) Wòrupïa mioʼnamonʼwa owene yòrupïarïkon tokarichïʼma iʼyainie ma. (Matthew 10:5, 6; 2 Corinthians 10:13) Morokon yako yeíʼmiaʼpo paʼme roropa erome, owe naʼna wòrupïarï aembo tïrïʼmaʼpopo eropa ma. Ènï paʼme aembo ïrïʼmïaʼpo ke joke Jesas wïkaʼpombo paʼmero naʼna kïneian, ‹òrupïatoko moʼkaron kariʼniakonʼwa, tïaʼro eropa ekaʼrotokopa,› ichaʼpombo.​—Acts 10:42.

Owero kariʼniakon eporïsan po èrupïaseinie naʼna ma. Jesasʼwa amukon tòrupïaʼma ma owero eporïsan po, ijowane paranakon mapo, ijoseʼpa toronakon po. (Mark 4:1; John 4:5-15) Naʼna eropa amukon èrupïano Opoto Papa Karetarï poko owero eporïsan po​—omakon ta, omaminiatoʼkon po, wïtopose ichoʼmasan eporïʼpïo poro, ijoseʼpa ouranatoʼkon ta maroro. Tïwòrupïatopopa wokaramaʼpotoro naʼna kïnòrupïano tïpïonaro omandononʼwa, tomaminiari akonokonʼwa, tïwòmeparï akonokonʼwa, tasakarïkonʼwa eropa. Ijomboro erokon paʼme tïmongeme naʼna weijï òʼwin yatï kariʼniaʼwa nono wararo ‹moro wosepatomatopo poko juʼpïn ouranano› etapoan.​—Psalm 96:2.

Noʼkïʼwa wane Opoto Papaʼwa Yopotomarï poko moro juʼpïn ouranano ekarichïse ma, òtï tuwaponome yeijï upuʼtoʼme iʼya? Ènï juʼpïn neroten kuwaponokon poko ouranano oʼwa roten kïsenai. Ekariʼcho te, koímbio pore eropa moro paʼme èʼcho!

• Òtï ‹juʼpïn ouranano› tokarichïsepa na?

• Neiara Jehoba poko Wòrupïatonon Jesas wòrupïaʼmaʼpombo paʼmero nòrupïaton?