-Da Zezi ɔˈ ˈmɛn nɔnˈˈ ɔn ˈˈkwaan in ɛn, -ka ɔ ˈdhaa ˈka ka: ‘ˈBheɔglɔ ɔˈ -bɔyaˈˈ bo ɔ muɛn -bhlaa da ˈbhlʋa aˈ klɛɛ ˈˈkpe, -wɛeˈ ɲʋn sea Zuifʋ nɩn- ˈye bo ˈŋwɔn. -Bho ɛ ˈghlʋ ˈo ɛˈ, -wɛeˈ ˈkmʋn anˈ ˈdhe -gwɛaˈ ˈye ɲnin.’ (Matie 24:14) Ka -bɔyaˈˈ -bo -ˈnɔn ˈye -bhlaa sʋn nʋn- da ˈbhlʋa aˈ klɛɛ ˈˈkpe -ɛ? -Bho ɔ ˈye -bhlaa aˈ, -ka Zezi nʋan -da ɔ nɩan da ˈbhlʋa ˈˈkpe -dhe ɛ, ˈkamɔn- -a -ˈye nʋn.—Lukɩ 8:1.

-Aa muɛn ŋmɛinˈˈ ˈdhii. -Ka Zezi ɔˈ dhɛcɩaʋn ˈyea -bo -bhla sʋn nʋn ŋmɛinˈˈ ˈdhii ɛ, ɔ -tɔɔɛn- ʋbʋ ˈmɛn. (Matie 10:11-13; Nʋʋdhɩ- 5:42; 20:20) -Bobhlaʋn- nɩan tɛnˈˈ ɛn, -da ʋʋ ˈyea -bo -bhlaa a, ɲʋn -tɔɔn ˈbho ʋbʋ ˈmɛn. (Matie 10:5, 6; 2 Kolɛntɩ 10:13) ˈZɩan -ke ɛ, -aaˈ -bobhlasʋn -deeɛ- kpɔ ˈˈɩ. Ɲɔnsoagbu- nɩan ˈo glɔ ˈdhi ɛ, ʋn ˈbhleɛ ʋanˈ -nɛn kpɔ ʋn ˈye -bo bhla ˈbho ˈdhi. Ɛɛ nʋɛnˈ ˈtee Zezi -siia- -abʋ, -ɛ nɩan ‘-a -ˈye ghlu bhla ˈdhe ɲʋn bho’ ɛ, -aa yeɛ ˈˈjhriɛ ˈˈdu. —Nʋʋdhɩ- 10:42.

-Aa poɛ ˈe ˈkpɩ ˈˈdhe -aa mun -da ˈˈoo -da ɲʋn nɩan. Zezi bhla -bo ˈˈkpae -gwea- i, ˈtɔnin- -gwliˈi, ɛmɛn -e -da ɲʋn an jriia ˈˈnin -e. (Makɩ 4:1; Zan 4:5-15) -Abʋ -ke ɛ, -da ˈˈoo -da -aa jhɛɛa ɲʋn ɛn, -aa -ˈtmʋʋɛn- ʋbʋ Biiblʋ aˈ dɩ. Ɛ ˈbhɛɛˈ ɛ ˈye ˈo -jeˈˈ -e ˈdhe ˈdhɔɔ -e ˈbho ˈtmʋʋndheinˈˈ ˈŋwɔn nɩn-. Ɲʋn -anˈ ŋmɛinˈˈ nɩn- -aaˈ ŋmɛinˈˈ ˈˈkwaan ˈdhi -e ɲʋn -nɩn -aa nʋan dhbho -e ɲʋn -nɩn -aa pa klainˈˈ -e ɲʋn anˈ klɛɛ -a jhibha a, -aa bhla -bo ˈdhe ʋbʋ bho. ˈKpɩ aˈ klɛɛ -aa poa ˈe ɛ, ɩan nʋɛnˈ ɲʋn anˈ mliɔn da ˈbhlua aˈ klɛɛ ˈˈkpe, ʋa yea ‘bɔyaˈˈ -bo -ɔɔ ˈpʋʋa ɲʋn’ ˈŋwɔn.—Psaume 96:2.

Ɲɔn -man ˈbɔan -ˈyea Ɲɔnsoa aˈ ˈBheɔglɔ ɔˈ -bɔyaˈˈ bo bhla ˈdhe bho -e dhɛ ɛɛ muan ˈe ɲɔn -ˈnɔn ɔnˈ ˈkmʋn ˈdhi -po ɛ, -naan ɛɛˈ dɩ tɔˈ i. -Manˈ ɲniin -bɔyaˈˈ -bo -ˈnɔn -glʋˈ -dhe. Bhlɔ ˈdhe ɲʋn bho.

• ‘-Bɔyaˈˈ -bo’ -wɛ -a -ˈye bhla -a?

• Ka Zoova aˈ -Bobhlaʋn- an nʋn Zezi -sraan sʋn ˈdhe ʋaˈ -bobhlasʋn ˈdhi -ɛ?