Nekagi ni Jesus nige na patayna: “Yaw nga mapia nga dumug na Pappatulan ay melayyagayya ta interu nga paddianan nga davvun nga pamakurug ta ngaming nga nasion, kabalinna, duttal ngana i panuppalan.” (Mateo 24:14) Ngem kunnasi nga matuppal yaw? Gukaban na panuttul ta ehemplo ni Jesus gari ta keggana ta davvun.—Lucas 8:1.

Angngayammi i totolay ta mismu nga baleda. Sinanay ni Jesus i apostolna ira nga mangilaygayya ta mapia nga dumug ta babalay. (Mateo 10:11-13; Kingngua 5:42; 20:20) Egga natunno nga teritoria nga pallaygayyadda. (Mateo 10:5, 6; 2 Corinto 10:13) Kunnatun gapa ta maddaggun, naorganisa tu mapia i pallayyagayyami anna egga natunno nga teritoria nga trabahuan na kada kongregasion. Gukaban na yaw, matuppalmi i bilin ni Jesus nga “mallaygayya ta totolay anna mamakurug tu mapia.”—Kingngua 10:42.

Kuammi i adde na mawayyami nga malaygayyan i totolay maski sitaw. Nangipasingan gapa si Jesus tu ehemplo gukaban na pallayyagayya ta publiko nga lugar—ta aggig na bebay onu ta attagabban tu danum. (Marcos 4:1; Juan 4:5-15) Makiyuvovug kami gapa ta totolay meyannung ta Biblia ta dala-dalan, lugar na negosio, parke onu ta telefono. Mallaygayya kami gapa ta karruba, katrabahu, kaklase anna parientes nu egga oportunidad. Megafu taw, minillion nga totolay ta interu mundo i nakaginna ta ‘mapia nga dumug na kapalliagan.’—Salmo 96:2.

Egga kari mapanonomu nga puedem pangikagianan ta mapia nga dumug na Pappatulan na Dios? Iyesplikam i efekto na yaw nisa ta mappange. Ariammu iyetù yaw nga mensahe nga mangiyawa tu iddanama. Ikagim yaw nira ta ngaming nga oportunidad!

• Anni nga “mapia nga dumug” i mawag nga melayyagayya?

• Kunnasi nga paparigan na Saksi ni Jehova i pallaygayya ni Jesus?