Ọkuẹsẹ ọle yu, Jesu taman mhan: ‘Ẹmhọn ọnin Agbejele ọsi Osẹnobulua nan, adẹ ta nin otọ agbọn rebhe, nọn ha yi ọsali rẹji ọrẹbhe, ọkpelẹn kuẹ vae.’ (Matthew 24:14) Be akirẹ lu ọnan yẹ? Sade mhan rẹkhan oẹ nin Jesu zẹle.—Luke 8:1.

Mhan bu ẹbho bhi uwa nọnsele. Jesu man edibo nọnsọle ebi ele rẹ ha tẹmhọn Osẹnobulua yẹ rẹ nin uwa rẹsi uwa. (Matthew 10:11-13; Acts 5:42; 20:20) Bhi ore nọn gbera, agha eji ele ada ha tẹmhọn Osẹnobulua. (Matthew 10:5, 6; 2 Corinthians 10:13) Iriọ yẹ nọn ẹlẹnan. Are emhanmhan nin agbotu kẹkẹ eje ele ada ha tẹmhọn Osẹnobulua. Ọnan rẹkpa mhan rẹ rẹkhan uhi ọsi Jesu nin mhan rẹ tẹmhọn Agbejele man ọrebhe.—Acts 10:42.

Mhan situa rẹ miẹn eria bhi eji ele irẹ ha ye. Jesu re ijiẹmhin nọn gba bhi otọ, nọn rẹ ha tẹmhọn Osẹnobulua man ọrebhe bhi eji ele irẹ ha ye. (Mark 4:1; John 4:5-15) Iriọ yẹ nọn, mhan nin ẹbho talọ bhi ije erebhe bii ẹki, isikulu, uwedẹ, ifoni, bi isi iwẹnna. Mhan yẹ wo tẹmhọn Osẹnobulua man ene diake mhan. Enin uwedẹ nan rẹkpa mhan rẹ ha tẹmhọn Osẹnobulua nanbhi otọ rebhe beji ele ha da miẹn umiẹnfan.—Psalm 96:2.

Ọbhọ uwẹ riale uwẹ asabọ tẹmhọn Osẹnobulua man? Hẹi re ọnin ẹmhọn Osẹnobulua ya nin egbe ẹ ọkpa. Uwẹ nọn họn, taman ene bha sẹ họn!

• ‘Ọta nọn mhẹn’ nela ada wewe?

• Be Esali Jehova rẹ ri egbe khọkhọ iJesu yẹ bhi iwẹnna itẹmhọn Osẹnobulua?