AḤRIC 12
Amek i neţberriḥ?
Σisa yenna-d uqbel ad yemmet: “Linǧil n tgelda ad iţwabecceṛ di ddunit meṛṛa, d cchada, i leǧnas meṛṛa. Imiren a d-teḥdeṛ taggara.” (Matta 24:14) Meεna, amek ara yeţwaxdem leqdic-agi n ubecceṛ di ddunit meṛṛa? Ad yeḍru waya ma netbeε lemtel i d-yeǧǧa Σisa.—Luqa 8:1.
Si tewwurt ɣer tewwurt. Σisa yemla i inelmaden-is amek ara ţberriḥen linǧil, yeεni lexbaṛ n lxiṛ, seg wexxam ɣer wayeḍ. (Matta 10:11-13; Lecɣal 5:42; 20:20) Imasiḥiyen imezwura llan sεan imukan i sen-d-iţwaεezlen akken ad berrḥen deg-sen. (Matta 10:5, 6; 2 Ikurintiyen 10:13) Ula d ass-a, aberreḥ-nneɣ yeţwaxdam s lqis: mkul tajmaεt iţwaεzel-as-d wemḍiq ideg ara tberreḥ. Akka, nezmer a nessiweḍ a nexdem ccɣel i ɣ-d-yefka Σisa, yeεni a nbecceṛ w’a nefk cchada i yemdanen meṛṛa.—Lecɣal 10:42.
Ţţawilat nniḍen i uberreḥ. Σisa yella yeţberriḥ deg imukan meṛṛa ideg yeţţaf lεibad. Di lemtel, yexdem annect-a ama rrif n lebḥeṛ ama zdat n lbir. (Marqus 4:1; Yuḥenna 4:5-15) Neṭṭafar lemtel n Σisa m’ara nheddeṛ i lɣaci ɣef Wedlis Iqedsen di mkul amkan ideg i ɣ-iţţunefk lḥal: deg iberdan, anda i xeddmen lεibad, di leǧnanat akk-d imeḍqan nniḍen. Nessexdam daɣen tilifun. M’ara ɣ-yeţţunefk lḥal, neţberriḥ i lǧiran-nneɣ, i wid ukud i nxeddem, i wid ukud i neqqar akk-d iεeggalen n twacult-nneɣ. S lmeǧhudat-agi yakk i nxeddem, d imelyunen n lεibad di ddunit kamel i geslan i lexbaṛ n lxiṛ n “leslak”.—Ahellil 96:2.
I menhu i tebɣiḍ aţ-ţhedṛeḍ ɣef lexbaṛ n lxiṛ n Tgelda n Ṛebbi d wayen ara d-tawi ɣer zdat? Ur ţţaǧǧa ara i yiman-ik kan lexbaṛ-agi i d-yeţţaken asirem, hdeṛ fell-as akken kan ara k-teţţunefk tegniţ!
-
D acu-t “linǧil”, yeεni lexbaṛ n lxiṛ, i glaqen ad iţţubecceṛ?
-
Ass-a, nettabaε lemtel i d-yeǧǧa Σisa deg uberreḥ. Amek?