O’du Yesu ni drazu ri ni ecazu enyia ogogo ria, ’yo ’dini: “Te e’yo bari suruni ’diri nga ovu oluzaru angu wudrikuru drisi dria, e’yo eti nzezu suru dria dri indi; o’du asiza niri nga di eca ndo.” (Matayo 24:14) Te e’yo oluza wudrikuru si ’diri nga i ’ye ngoni ngoni ya? Eri nga i ’ye ’bani pamvu ndra Yesu ni ’ba ri ma vuti obizu risi.—Luka 8:1.

Ama aci ’ba eyi vu akuasi akuasi. Yesu imba ndra ’ba ima vuti bipi ’diyi e’yo bari oluzu akuasi akuasi. (Matayo 10:11-13; ’Yeta 5:42; 20:20) ’Ba fe ndra Kristiani eli turu alu oko ’da ma alea ’diyi ni pari eyini e’yo oluzu ri ci. (Matayo 10:5, 6; 2 ’Ba Korintoa ’Diyi 10:13) Tro tro ’dini andrusi, otuta amani azi e’yo oluzu rini ri kilili azini ongulumu alu alu ma pari azi nde ngazu ri ci. ’Dinile ama di azi Yesu ni ndra fe “amani e’yo oluzu ’ba vu, e’yo eti nzezu” ri nga kilili.—’Yeta 10:42.

Ama o’bi asi driasi ca pari ci amani ecozu ’baki isuzu ra ria. Yesu e’da vini amani eceta erini e’yo oluzu pari ’bani okuzuru ria ri ra. Ecetasi olu e’yo miri tiasi azini pari ongulumu ni yi a’di kozu ria. (Marako 4:1; Yohana 4:5-15) Tro tro ’dini ama vini e’yo nze ’ba eyi pie pari ci amani ecozu eyi isuzu ra ria—ekile nzila tiasi, cuasi, pari mutuka tuzu riasi, kaniku simu aleasi. Ama vini e’yo eti nze ’ba ama jo ejele ru ’diyi pini, ’ba amani azi ngazu ’diyi pie, azini ama ori’ba eyini sawa ci drileba ni i fezu ria. Okpo ama alu alu ni ’ba ’disi ’ba milioni milioni wudrikuru si eriki di “pata eriniri ma e’yo” bo.—Zaburi 96:2.

Agu azi mini e’yo egazu drinia le mi ma olu erini e’yo baru Suru Munguni ’di ma dria azini e’yo nde ’di ma orodri ewu driale ri ma alea ngoni’ari ni ci ya? Mi mba e’yo ’di ma ta mi ngulupi ni a’dule ku. Le mi olu eri ’ba azi ’diyi ni mbele ecekokoru!

• “E’yo baru” le ’ba ma olu ecekokoru ra ri ngo’i ya?

• ’Ba Yehova ma E’yo Eti Nzepi ’Diyi geri Yesu ni ndra e’yo oluzuri ma vuti obi ngoni ngoni ya?