Shimbu kanda afwenga, Yesu ambile ngwenyi: “Kahou mujimbu wamwaza waWangana navakawambulula kumavu kwatwama vatu kwosena, nakupwa unjiho kuli vaka-mafuchi osena, numbanyi kukuma chikeze.” (Mateu 24:14) Jino ou mulimo wakwambulula mukaye kosena navakautesamo ngachilihi? Navakautesamo hakukavangiza jila azachishile Yesu omu apwile hano hamavu.—Luka 8:1.

Tweji kuyanga nakwambulwila vatu hamembo avo. Yesu anangwile tumbaji twenyi vambululenga mujimbu wamwaza kuzuvo hizuvo. (Mateu 10:11-13; Vilinga 5:42; 20:20) Vaka-kwambulula vamulikulukaji lyamyaka lyakulivanga vavalwezele kwakuya nakwambulwila. (Mateu 10:5, 6; Wavaka-Kolinde 2, 10:13) Namakumbi ano nawa, mulimo wetu wakwambulula vaulongesa kanawa, kaha chikungulwilo hichikungulwilo vachihana ngalila yakwambulwila. Echi cheji kutukafwanga tutesemo lushimbi lwaYesu ‘lwakwambulila vatu mujimbu nakuhana unjiho.’—Vilinga 10:42.

Twafwila kuhanjika navatu kala kweshokwo natuvawana. Yesu ahanyine nawa chakutalilaho hakwambulwila vatu kuvihela vyasanga vyakufwana nge kungenge yakalungalwiji nakulishima vaswichilenga vatu meya. (Mako 4:1; Yowano 4:5-15) Nayetu nawa tweji kuhanjikanga navatu hamijimbu yamuMbimbiliya kukala chihela tweji kuvawananga, numba vapwa mumikwakwa, chipwe kuvihela vyakusekasanyina, chipwe kumilemba yakuhemena, chipwe kuzachisa shinga. Tweji kwambulilanga navaze twalihata navo, navakwetu vaka-shikola chipwe vaka-milimo, navausoko wetu nge chinahase. Vyuma vyosenevi vikiko vinalingisa mamiliyoni avatu kumavu kwosena vevwenga mujimbu wamwaza ‘waulwilo.’—Samu 96:2.

Nayenu munahase kwazana mujimbu wamwaza waWangana waKalunga nakausoko kenu chipwe nasepa lyenu, nakuvalumbunwina vyuma navakanganyala kulutwe. Kanda kuswekela vakwenu ou mujimbu wamwaza walutalililoko. Valwezenuwo oholili vene ngana!

• Uno “mujimbu wamwaza” muka twatela kwambulula?

• Uno Vinjiho jaYehova veji kulondezezanga ngachilihi jila azachishile Yesu hakwambulula?