Ma dya kja ma mezhe kʼe paa ma ro nrru̱u̱ e Jesús, angeze go mama ga kjaba: “Nukʼua textjo kja ne Xoñijomꞹ ri ka̱ra̱ kʼo ra zopjꞹ yo ntee ra xipjiji ra dyⱥtⱥji Mizhokjimi nange ngeje kʼꞹ manda” (Mateo 24:14). ¿Ja rgua zⱥdʼⱥ kʼo go mama e Jesús? Ro bʼꞹbʼꞹ ntee ke ro tsjaji ja nzi ba tsjaa e Jesús, ro jichiji yo ntee (Lucas 8:1).

Ri jichijme yo ntee kja o ngunji. E Jesús mi jichi kʼo o discípulo ro ma zopjꞹji yo ntee kja o ngunji (Mateo 10:11-13; Hechos 5:42; 20:20). E Jesús o jichi o discípulo pje ro manji ma ro zⱥtrʼⱥji kja o ngunji yo ntee. Xo go xipji ja je ro zⱥtrʼⱥji kja kʼo jñiñi (Mateo 10:5, 6; 2 Corintios 10:13). Ngekʼua nudya nrrexe yo congregación ja ri jmurꞹjme yo ri testigojme e Jehová, ri pɇsʼijme janzi jñiñi nu ja ri jichijme texe yo ntee pje mama o Jñaa e Mizhokjimi, ga kjanu ri kjagojme kʼo go mama e Jesús (Hechos 10:42).

Ri zopjꞹjme nrrexe yo ntee kʼo ri chjɇgojme. E Jesús mi zopjꞹ kʼo ntee kʼo mi chjɇbi kja ñʼii, kʼo mi pa tuʼu nrreje kja meje. Na nu paa o jichi kʼo ntee añꞹnꞹ kja kʼe trʼazapjꞹ (Marcos 4:1; Juan 4:5-15). Nudya, yo ri testigojme e Jehová xo ri kjagojme ga kjanu, ri jichijme o Jñaa e Mizhokjimi yo ntee kʼo ri chjɇjme kja ñʼii, ri zopjꞹjme yo ntee kja o nrrenrraji, ri zopjꞹjme kja teléfono, ri zopjꞹjme yo ka̱ra̱ kja in jñiñigojme, ri zopjꞹjme yo ntee nu ja ri pɇpjijme, ri zopjꞹjme yo in pjamiliagojme ñe in bʼedyigojme, yo poji kja kolejio zopjꞹji o dyojui. Ga kjaba na punkjꞹ ntee kja ne Xoñijomꞹ pa̱ra̱ji ke ra zⱥdʼⱥ nu paa ma e Jehová ra mbøxkꞹgoji ra ka̱ra̱ji na joo (Salmo 96:2).

¿Gi pa̱rge na ntee kʼꞹ dya pa̱ra̱ pje mama ne Biblia? ¿Gi pa̱rge na ntee kʼꞹ dya pa̱ra̱ pje ngeje o Reino Mizhokjimi ñe ja rga mbøxkꞹgoji? Ri xipji kʼo a gui xørꞹge kja ne Biblia, ngekʼua angeze xo ra mba̱ra̱kʼo.

• ¿Pje go mama e Jesús ke ra ma jichiji yo ntee?

• ¿Ja ga xⱥkⱥjmedya e Jesús yo ri testigojme e Jehová ma ri jichkʼojme yo ntee?