പാഠം 12
ദൈവരാജ്യത്തെക്കുറിച്ചുള്ള സന്തോഷവാർത്ത എല്ലാവരെയും അറിയിക്കുന്നത് എങ്ങനെ?
തന്റെ മരണത്തിന് ഏതാനും ദിവസം മുമ്പ് യേശു പറഞ്ഞു: “ദൈവരാജ്യത്തിന്റെ ഈ സന്തോഷവാർത്ത എല്ലാ ജനതകളും അറിയാനായി ഭൂലോകത്തെങ്ങും പ്രസംഗിക്കപ്പെടും. അപ്പോൾ അവസാനം വരും.” (മത്തായി 24:14) പക്ഷേ ഈ പ്രസംഗപ്രവർത്തനം ലോകവ്യാപകമായി എങ്ങനെ നിർവഹിക്കും? യേശു ഭൂമിയിലായിരിക്കെ കാണിച്ചുതന്ന അതേ മാതൃകയിൽ!—ലൂക്കോസ് 8:1.
ആളുകളെ അവരുടെ വീട്ടിൽ ചെന്ന് കാണുന്നു. വീടുതോറും ചെന്ന് ദൈവരാജ്യത്തിന്റെ സന്തോഷവാർത്ത പ്രസംഗിക്കാൻ യേശു ശിഷ്യന്മാരെ പരിശീലിപ്പിച്ചു. (മത്തായി 10:11-13; പ്രവൃത്തികൾ 5:42; 20:20) പ്രസംഗപ്രവർത്തനത്തിനുവേണ്ടി ഒന്നാം നൂറ്റാണ്ടിലെ ആ ക്രിസ്ത്യാനികൾക്കു ചില പ്രദേശങ്ങളും നിയമിച്ചുകൊടുത്തു. (മത്തായി 10:5, 6; 2 കൊരിന്ത്യർ 10:13) ഇന്നു ഞങ്ങളുടെ പ്രസംഗപ്രവർത്തനവും വളരെ സംഘടിതമായിട്ടാണു നടത്തുന്നത്. സന്തോഷവാർത്ത പ്രസംഗിക്കാൻ ഞങ്ങളുടെ ഓരോ സഭയ്ക്കും പ്രദേശം നിയമിച്ചുതന്നിട്ടുണ്ട്. അങ്ങനെ, “സമഗ്രമായി സാക്ഷീകരിക്കാനും ജനത്തോടു പ്രസംഗിക്കാനും” ഉള്ള യേശുവിന്റെ കല്പന അനുസരിക്കാൻ ഞങ്ങൾക്കു കഴിയുന്നു.—പ്രവൃത്തികൾ 10:42.
ആളുകളെ കണ്ടെത്താനിടയുള്ള സ്ഥലങ്ങളിലെല്ലാം സാക്ഷീകരിക്കുന്നു. പൊതുസ്ഥലങ്ങളിൽ സന്തോഷവാർത്ത പ്രസംഗിക്കുന്നതിലും യേശു നല്ലൊരു മാതൃകയായിരുന്നു. കടൽത്തീരത്തും കിണറ്റിൻകരയിലും ഒക്കെ യേശു ആളുകളോടു പ്രസംഗിച്ചു. (മർക്കോസ് 4:1; യോഹന്നാൻ 4:5-15) ഞങ്ങളും ആളുകളെ കണ്ടുമുട്ടാനിടയുള്ള എല്ലായിടത്തും—തെരുവുകളിലും കടകളിലും പാർക്കുകളിലും—ബൈബിൾവിഷയങ്ങൾ സംസാരിക്കാറുണ്ട്. ടെലിഫോണിലൂടെയും ഞങ്ങൾ സാക്ഷീകരിക്കുന്നു. അയൽക്കാർ, സഹപ്രവർത്തകർ, സഹപാഠികൾ, ബന്ധുക്കൾ എന്നിവരോടു സാക്ഷീകരിക്കാൻ ലഭിക്കുന്ന അവസരങ്ങളും ഞങ്ങൾ പാഴാക്കാറില്ല. ‘രക്ഷയുടെ സന്തോഷവാർത്ത’ ലക്ഷക്കണക്കിന് ആളുകളുടെ അടുത്ത് എത്തിക്കാൻ ഇതുവഴി ഞങ്ങൾക്കു കഴിഞ്ഞിട്ടുണ്ട്.—സങ്കീർത്തനം 96:2.
ദൈവരാജ്യത്തെപ്പറ്റിയുള്ള സന്തോഷവാർത്ത ആരുമായി പങ്കുവെക്കാനാണു നിങ്ങൾ ആഗ്രഹിക്കുന്നത്? അത് ആ വ്യക്തിയുടെ ഭാവിയെ എങ്ങനെ സ്വാധീനിക്കുമെന്നാണു നിങ്ങൾ കരുതുന്നത്? പ്രത്യാശ പകരുന്ന ഈ സന്ദേശം നിങ്ങളിൽ മാത്രമായി ഒതുക്കിവെക്കരുത്. എത്രയും പെട്ടെന്ന് മറ്റുള്ളവരോട് അതെക്കുറിച്ച് പറയുക!
-
എന്തിനെപ്പറ്റിയുള്ള “സന്തോഷവാർത്ത”യാണു നമ്മൾ അറിയിക്കേണ്ടത്?
-
യഹോവയുടെ സാക്ഷികൾ യേശുവിന്റെ പ്രസംഗരീതി അനുകരിക്കുന്നത് എങ്ങനെ?