Pano e Yesu atani afwe watili: “Ni landwe lizima ilya Wufumu liliwalandwa munsi yonsi kukuwa uwunte ku myiko yonsinye apano insilo iliyiza.” (Mateyu 24:14) Uzye walinji nu kuwizya wuli ilandwe lizima munsi yonsinye? Walinji nu kukolanya vino e Yesu wacitanga pano walinji munsi.—Luka 8:1

Tukakoncela awantu pa mang’anda pa mwawo. E Yesu wasambilizizye awasambilizi wakwe ukuwizya ilandwe lizima ku ng’anda ni ng’anda. (Mateyu 10:11-13; Imilimo 5:42; 20:20) Wakawizya wakutalicila wapilwe ivifulo umwakuwombela. (Mateyu 10:5, 6; 2 Wakorinte 10:13) Na pa mpindi yonye yo-o, umulimo witu wawuteyanya icete, icakuti cila liwungwe lyapwa icifulo ca kuwizizyamo. Co-o cikalenga twakonka icete vino e Yesu watunenile ‘ukuwizya ilandwe lizima ku wantu nu kuwapa sana uwunte’ ndi vino Yesu walanzile.—Imilimo 10:42

Tukalanda na wantu konsinye kuno wangazanwa. E Yesu wasambilizyanga awantu konsinye kuno wawazana, ivikole mu mbali ye sumbi na mu vifula muno awantu awavule wasembanga aminzi. (Marko 4:1; Yohani 4:5-15) Na sweswenye tukalanda na wantu pe Baibolo konsinye kuno wangazanwa, mu misewo, pa maliketi, muno awantu wakaya mukutandala, nanti ukupitila mu kuwomvya foni. Swinya lyonsinye nga twawa nu longo, tukawizizyako awina mupalamano, wano tukawomba nawo, wano tukasambilila nawo ku sukulu, na walupwa. Ukucita wo-o kwalenga awantu awavule insi yonsinye ukwivwa ‘ilandwe lizima ilya kupususya kwa kwe Yehova.’—Amalumbo 96:2.

Uzye kuliko wino mungakunda ukunenako ilandwe lizima ilya Wufumu na vino wulimucitila kunkolelo? Mutasumba impindi ukunenako wanji ilandwe lizima!

• Uzye ali “landwe lizima” ci lino tufwile ukuwizya?

• Uzye Inte zya kwe Yehova wakakolanya wuli Yesu pano wakuwomba umulimo wakuwizya?