Kema Jesús nechka mikiskia kiijtok: “Uan tlakamej [o maseualmej] tlakamauitij ni kuali tlamachtili [...] ipan nochi tlaltinij ipan ni Tlaltipaktli para nochi tlakamej ma kimatikaj. Uan teipa ualas itlamia nochi tlen onka” (Mateo 24:14). ¿Kenijkatsa titlajtolmoyauaskiaj ipan nochi Tlaltipaktli? Kej kichijki Jesús kema itstoya ipan Tlaltipaktli (Lucas 8:1).

Tikinpaxalouaj maseualmej ininchajchaj. Jesús kinmachtik itokilijkauaj ma tlajtolmoyauakaj kajkalpa (Mateo 10:11-13; Hechos 5:42; 20:20). Nopa achtoui itokilijkauaj kiniljuik kanke monekiyaya tlajtolmoyauaskiaj (Mateo 10:5, 6). Ipan ni tonali nojkia techiljuiaj kanke titlajtolmoyauasej, uan sejse tlanechikoli kimati kanke moneki tlajtolmoyauas. Kej nopa uelis titlajtolmoyauasej uan “tikinkamauitij nochi tlakamej” kej technauatik Jesús (Hechos 10:42).

Tijchiuaj kampeka tikintemosej maseualmej kampa itstokej. Jesús nojkia tlajtolmoyajki kampa itstoyaj miakej, kej kampa atentli o kampa ameli (Marcos 4:1; Juan 4:5-15). Tojuantij nojkia titemachtiaj ika Biblia kampa ueli, kej ojtipa, kampa tlanamakaj o titenojnotsaj ika teléfono. Kema tiuelij nojkia tikinpouiliaj tokalnechkauaj, katli tekitij o momachtiaj touaya uan tochampoyouaj. Nochi ni kichijtok tlauel miakej ipan nochi Tlaltipaktli ma kikakikaj nopa kuali tlamachtili tlen kenijkatsa toTeotsij “temakixtia” (Salmo 96:2).

Ximoiljui ajkia mitspaktiskia tijpouilis nopa kuali tlamachtili tlen toTeotsij iTlanauatijkayo uan tlake tlateochiualistli kichiuas ma onka. Amo san ta xijmajto. Moneki nima tijpouilis se akajya.

• ¿Tlake “kuali tlamachtili” moneki tijmoyauasej?

• ¿Kenijkatsa Jehová itlajtoltemakauaj nojkia tlajtolmoyauaj kej kichijki Jesús?