Kua̱ poliwiá áchisan tiempoj iga Jesús mamiki, kijtoj: «Iní̱n ye̱kti wan yankuiʼ tajto̱lmej de Irreinoj Dios, momoya̱was pan nochi ta̱jli, iga makimatikan nochi a̱ltepe̱mej, wan de ompa wi̱ts poliwilis» (Mateo 24:14). ¿Kén mochi̱waskiá iní̱n tajto̱lmoya̱walis pan nochi ta̱jli? Monekiá iga mamochi̱wa ken Jesús kichij kua̱ onoya pan Ta̱jli (Lucas 8:1).

Nikpaxa̱lowiliáj la gente pan icha̱n. Jesús kine̱xtilij idiscipulojwan iga kua̱ matajto̱lmoya̱wakan de iní̱n ye̱kti tajto̱lmej maya̱kan de kajli pan kajli (Mateo 10:11-13; Hechos 5:42; 20:20). Ini̱nmej yej achto tajto̱lmoyajkej, kijlijkej kan monekiá matajto̱lmoya̱wakan (Mateo 10:5, 6; 2 Corintios 10:13). Ijko̱nsan no̱ a̱man nitajto̱lmoya̱waj, cada tanechko̱lis kimatij hasta kan welij tajto̱lmoya̱waj. Ijkó̱n welij nikchi̱waj ken kijtoj Jesús iga manitajto̱kan wan nochi gente (Hechos 10:42).

Nimotekitiliáj iga mania̱kan kan onokej la gente. Jesús kine̱xtij kén mamochi̱wa, tajto̱lmoya̱waya kan onoloʼ, ken pan a̱te̱noj de lámar wan kan se̱ pozo (o a̱mel) kan nochimej asiáj iga makiki̱xtikan a̱ʼ (Marcos 4:1; Juan 4:5-15). Nejeme̱n no̱ ijko̱nsan nitajtowaj de Itajto̱l Dios no̱yan kan welij: pan calle, kan tanamakaj, pan parque o pan teléfono. Wan kua̱ welij, nitajtowaj de yej nimomachtiáj pan Biblia: wan nofamiliaj, yej cha̱ntitokej ina̱ de nocha̱n, yej iwan nitekipano̱waj wan yej iwan nimomachtiáj. Iní̱n kichi̱wa iga pan nochi ta̱jli millones de tajta̱gamej wan siwa̱tkej welij kikakij «Ye̱kti tajto̱lmej de yej te̱makixtiá» (Salmo 96:2).

Xitajla̱miki a̱ʼ yéj welij tikijliá de iní̱n ye̱kti tajto̱lmej de Irreinoj Dios wan xikijli te̱ yawi kichi̱wati iní̱n Reinoj. Xikijli seuʼmej de iní̱n ye̱kti tajto̱lmej iga amo tejsan xikmati. Wan kua̱ welij, xikne̱xtili seuʼmej iga no̱ makimatikan.

• ¿Te̱ «ye̱kti tajto̱lmej» moneki mamoijto?

• ¿Kén nitajto̱lmoya̱waj ken Jesús kichij?