Imane Yesu fatua lö mate ia, ”Teturiaigö dania mbanua Lowalangi andrö, turia somuso dödö ba gulidanö misa ma’asagörö ba wamaduhu’ö ba niha fefu; ba awena dania fa’atua danö.” (Matai’o 24:14) Hewisa wangombakha, mazui fanuriaigö, nifalua ba zi sagörö ulidanö andre? Mu’o’ö duma-duma nibe’e Yesu me so ia ba gulidanö.—Luka 8:1.

Ma’odödögö wangondrasi niha ba nomora. Ifaha’ö ndra nifaha’önia Yesu ba wangombakha turia somuso dödö ba nomo misa. (Matai’o 10:11-13; Halöwö Zinenge 5:42; 20:20) Niha sanuriaigö ba götö föna tefatenge ira ba wangombakha ba mbanua si no latatugöi. (Matai’o 10:5, 6; II Korindro 10:13) Ba ginötö andre, halöwö fanuriaigö nifaluama no lahenaigö laföfö’ö, ba ero sambua angowuloa no latatugöi hezo mbanua niʼohalöwögöigö. Börö zimanö, tola ma’o’ö niwa’ö Yesu ”mituriaigö ba niha fefu ba mifaduhu’ö”.—Halöwö Zinenge 10:42.

Ma’odödögö wamalukhaisi niha gofu hezo so ira. No ibe’e duma-duma Yesu wanuriaigö ba zi so niha sato, duma-dumania ba zinga nasi mazui ba zinga nidanö (Mareko 4:1; Yohane 4:5-15) Ma fadunö-dunö göi ba niha fefu sanandrösa ba Zura Ni’amoni’ö gofu hezo manö-he ba lala, ba hari mbale, ba kabu, mazui fatelefo. Aefa da’ö, maturiaigö ba zi fahatö omo khöma, khö nawöma wohalöwö, awöma ba zekola, ba si fahuwu khöma na so ginötö si tefaudu. Fefu nifalua andre ba wame’e inötö ba niha gulidanö ma’asagörö ba wamondrondrongo ”turia wangorifi andrö”.—Zinunö 96:2.

Hadia omasi ndra’ugö öfatunö ba niha duria somuso dödö sanandrösa ba Mbanua Lowalangi andrö ba howu-howu ba zi so föna? Turia nidöna-döna andre tenga nibini’ö. Fatunö ba niha bö’ö ba wa’alio!

• Hadia ”duria somuso dödö” si lö tola lö mu’ombakha’ö?

• Hewisa wolo’ö ndra Samaduhu’ö Yehowa duma-duma nibe’e Yesu ba wanuriaigö?