Jesus ájídin jidooleeł bichʼįʼ yoołkáałgo díí yee haadzííʼ: “Áádóó yáʼąąshįį bee bóhólníihgo bił hazʼáanii baa Haneʼ Yáʼátʼéehii nahasdzáán nidahoneesʼą́ą́góó, ałʼąą dineʼé tʼáá ałtso bee hwéédahodoozįįł biniyé bee hoł dahodoonih, áko áadi índa nihodoogááł.” (Matthew 24:14) Ákoshąʼ haash yitʼéego éí nahasdzáán nidahoneesʼą́ą́góó, ałʼąą dineʼé tʼááʼałtso bił dahodoonihgo łaʼ doonííł? Jesus nahasdzáán bikááʼ nahojisneʼ yę́ęgi átʼéego łaʼ doonííł.​—Luke 8:1.

Diné tʼáá dabighangóó bił nidahwiilneʼ. Jesus éí bídahoołʼaahii yę́ę haneʼ yáʼátʼéehii dahooghangóó naʼnitin doo biniyé yee neineeztą́ą́ʼ. (Matthew 10:11-13; Acts 5:42; 20:20) Níléídę́ę́ʼ dahalneʼii yę́ę kweʼé ndahodoołnih dabidiʼníigo baa dahiditʼaah ńtʼééʼ. (Matthew 10:5, 6; 2 Corinthians 10:13) Dííshjı̨́įdi tʼááʼákótʼé, nidahwiilneʼígíí nizhónígo yilwoł, dóó áłah nídaadleehgóó haneʼ yáʼátʼéehii yaa ndahodoolnihgi baa nídaditʼááh. Áko díí átʼéego Jesus “haneʼ yáʼátʼéehii bee diné bił dahołneʼ ” níigo yichʼįʼ nihííłʼaadígíí bohónéedzą́ągo bikʼeh ádaʼiilʼı̨́.​—Acts 10:42.

Wołíbee ádeitʼı̨́įgo diné dahólǫ́ǫ́góó bił nidahwiilneʼ. Jesus éí diné dahólǫ́ǫgi, tábąąhgi doodaiiʼ tó hahadleehgóó nihinááł naʼneeztą́ą́ʼ. (Mark 4:1; John 4:5-15) Nihí ałdóʼ daʼínííshgóó, ndaʼiiniihgóó, ndaʼnilkaadgóó dóó naaʼahóóhai nídaʼadleehgóó Diyin God Bizaad diné bee bił nidahwiilneʼ. Béésh bee haneʼé ałdóʼ chodeiniilʼı̨́. Nihá ashjaʼátʼįįhgo bił kéédahwiitʼínígíí, bił nideelnishígíí, bił daʼííníiltaʼígíí, dóó danihikʼéí danilínígíí bił nídahwiilnih. Díí átʼéego haleebee ádeitʼı̨́įgo “yisdáʼiildéehii tʼáá ákwíí jı̨́ baa” chʼídahwiyiitʼaah. Áko éí binahjįʼ ałʼąą dineʼé díkwííshı̨́ı̨́ miil ánéelą́ą́ʼgo nahasdzáán nidahoneesʼą́ą́góó deidiiztsʼą́ą́ʼ.​—Psalm 96:2.

God biNahatʼaʼ baa haneʼ yáʼátʼéehii łaʼ da náasdi bíká adoolwoł biniyé bił hodeeshnihísh nínízin? Díí ił chohooʼı̨́įgo haneʼígíí tʼáadoo tʼóó bił ánítʼéhí, tʼááʼákǫ́ǫ́ baa hólneʼ!

• Haʼátʼíísh “haneʼ yáʼátʼééhígíí” tʼááʼíiyisíí baa hodoonih?

• Jiihóvah Yá Dahalneʼéshąʼ haitʼéego Jesus nahasneʼ yę́ęgi átʼéego ndahalneʼ?