Yesu ari haihi kwitwa akagira ati: “Amakuru marungi aga ag’Obukama garyabuurirwa omu nsi yoona okuba eky’okuhamya aha mahanga goona; obwo nibwo emperu erihika.” (Matayo 24:14, NW) Kwonka shi omurimo gw’okubuurira omu nsi yoona gukaba nigwija kukorwa guta? Nk’oku Yesu yaagukozire obu yaabaire ari omu nsi.​—Luka 8:1.

Nitubuurira abantu omu maka gaabo. Yesu akatendeka abeegi be kubuurira amakuru marungi enju aha nju. (Matayo 10:11-13; Ebyakozirwe 5:42; 20:20) Ababuurizi ab’omu kyasha ky’okubanza bakaba bahairwe ebicweka by’okubuuriramu. (Matayo 10:5, 6; 2 Abakorinso 10:13) N’omu bunaku obu, omurimo gwaitu gw’okubuurira gutebeekanisiibwe gye, kandi buri kibiina nikiheebwa ekicweka ky’okubuuriramu. Eki nikitubaasisa kworobera ekiragiro kya Yesu ‘ky’okubuurira abantu.’​—Ebyakozirwe 10:42.

Nituteeraho kubuurira hoona ei abantu barikushangwa. Yesu akaba abuurira omu myanya erikukira kushangwamu abantu baingi, nk’aha nyanja nari aha iziba ry’abantu boona. (Mako 4:1; Yohaana 4:5-15) Naitwe nitukira kugaaniira n’abantu aha biri omu Baibuli turikubashanga aha nguuto, omu myanya y’eby’obushuubuzi, ei barikukwatira ebiiruka nari turikukoresa esimu. Kandi kyaba nikibaasika nitubuurira bataahi baitu, abu turikukora nabo, abu turikushoma nabo n’abanyabuzaare. Okubuurira omu miringo egi yoona kibaasiise abantu baingi omu nsi yoona kumanya amakuru marungi ‘g’okujunwa.’​—Zaaburi 96:2.

Noobaasa kubuurira abanyabuzaare n’abanywani baawe amakuru marungi g’Obukama aga, agaraababaasise kutunga ebirungi omu biro by’omumaisho. Oteeziringa kugababuurira!

• Ni makuru ki amarungi agu twine kubuurira?

• Omu kubuurira, Abajurizi ba Yehova nibatooreza bata Yesu?