Kolaa na Gyisɛse awu la, ɔbɔle ye nolo kɛ: “Bɛbabɔ Belemgbunlililɛ ne anwo edwɛkpa ɛhye nolo wɔ azɛlɛ ye azo amuala bɛava bɛali maanle maanle ne amuala daselɛ, kolaa na awieleɛ ne ara.” (Mateyu 24:14) Noko, kɛzi yɛbayɛ gyima ɛhye ɛ? Kyesɛ yɛsukoa Gyisɛse neazo ne mɔɔ ɔyɛle wɔ mekɛ mɔɔ ɛnee ɔwɔ azɛlɛ ye azo la.​—Luku 8:1.

Yɛbɔ mɔdenle yɛkɔ menli ne azua nu. Gyisɛse tetele ye ɛdoavolɛma ne kɛ bɛha edwɛkpa ne wɔ azua nu. (Mateyu 10:11-13; Gyima ne 5:42; 20:20) Bɛmaanle ɛvoya mɔɔ limoa la anu edwɛkpakavolɛma ne azɛlɛsinli mɔɔ bɛbaha edwɛkɛ ne wɔ nu la. (Mateyu 10:5, 6; 2 Kɔlentema 10:13) Ɛnɛ noko, bɛyɛ yɛ edwɛkɛhanlɛ gyima ne anwo ngyehyɛleɛ kpalɛ, yɛɛ bɛmaa asafo biala ɛleka mɔɔ ɔbayɛ ye gyima la. Ɛhye ka yɛ maa yɛdi Gyisɛse edwɛkɛ ɛhye, “yɛha edwɛkɛ ne yɛhile menli ne na yɛli ɔ nwo daselɛ bɔkɔɔ” la azo.​—Gyima ne 10:42.

Yɛbɔ mɔdenle yɛka edwɛkɛ ne wɔ ɛleka biala. Gyisɛse yɛle ɛhye anwo neazo ɔlua edwɛkɛ ne mɔɔ ɔhanle ye wɔ bagua nu, mɔɔ bie a le ɛnweazo anzɛɛ bula zo la azo. (Maake 4:1; Dwɔn 4:5-15) Yɛdayɛ noko yɛka Baebolo ne anu edwɛkɛ ne yɛkile menli wɔ ɛleka biala mɔɔ ɔkɛyɛ boɛ la​—gua zo, gyima nu, paake zo anzɛɛ telefuu zo. Eza yɛdi yɛ kpalɛzoamra, yɛ gɔnwo mɔ gyimayɛvoma nee sukuluma yɛɛ yɛ mbusuafoɔ daselɛ wɔ mekɛ mɔɔ yɛkɛnyia nwolɛ adenle la. Mɔdenlebɔlɛ ɛhye mɔ kɔsɔɔti ɛmaa menli mgbe dɔɔnwo mɔɔ wɔ aleɛabo la ɛde “ngoanelielɛ nwo edwɛkpa ne.”​—Edwɛne 96:2.

Nwane mɔ a ɛsuzu kɛ ɛbahola wɔaha Nyamenle Belemgbunlililɛ ne anwo edwɛkpa ne nee kɛzi ɔbaboa bɛ kenle bie la wɔahile bɛ a? Mmafea anyelazo edwɛkɛ ɛhye azo. Ɔkɛyɛ boɛ a, yɛ ye ndɛndɛ ka kile bɛ!

• “Edwɛkpa” boni a ɔwɔ kɛ bɛbɔ ye nolo a?

• Kɛzi Gyihova Alasevolɛ ɛlɛsukoa kɛzi Gyisɛse hanle edwɛkɛ ne la ɛ?