Vennich eb da Jesus kshtauva is, hott eah ksawt: “Dess Effangaylium fumm Reich vatt gebreddicht zu di gans veld fa en zeiknis zu alli lendah, un no kumd’s end.” (Matthäus 24:14) Avvah vi kend dess gedu vadda gans ivvah di veld? Bei’s da saym vayk du es da Jesus hott vann eah uf di eaht voah.​—Lukas 8:1.

Miah boviahra shvetza mitt leit an iahra haymeda. Da Jesus hott sei yingah ksawt vi fa di goodi sacha breddicha funn haus zu haus. (Matthäus 10:11-13; Apostelgeschichte 5:42; 20:20) Si voahra en area gevva fa breddicha drinn. (Matthäus 10:5, 6) In da saym vayk heit, unsah ministry is goot organized, un alli congregation is aw en area gevva fa breddicha drinn. Dess helft uns fa shvetza mitt so feel leit es ma kenna, koss da “Jesus hott uns gebodda es miah sella breddicha zu di leit.”​—Apostelgeschichte 10:42.

Miah doon alles es ma kenna fa shvetza mitt leit vo-evvah es si sinn. Da Jesus voah en goodah example bei breddicha zu leit in public, so vi bei “em say” adda en “brunna” vo leit als kumma sinn vassah greeya. (Markus 4:1; Johannes 4:5-15) Miah doon aw shvetza veyyich di Bivvel mitt leit vo-evvah es si sinn, so vi an business bletz, parks, ivvah da phone, adda even bei breef. Vann ma di chance greeya doon ma aw shvetza mitt unsah nochbahra, leit an di eahvet, an di shool, un aw mitt unsah freindshaft. Funn awl dee diffandi vayya macht’s possible es millions funn leit di goodi sacha heahra kenna es Gott sawkt.​—Psalm 96:2.

Kansht du denka funn ebbah es du sawwa vetsht veyyich di goodi sacha funn Gott Sei Reich un vass sell mayna kann fa si? Hald dee hofning nett yusht zu dich selvaht, avvah sherr’s mitt si so kshvind es du kansht!

• Vass fa “goodi sacha” missa gebreddicht sei?

• Vi sinn Jehova Sei Witnesses da Jesus sei example am immatayda vann si breddicha?