اپنی موت توں تھوڑی دیر پہلے یسوع مسیح نے کہیا سی کہ بادشاہی دی خوشخبری دی منادی ساری دُنیا وچ کیتی جائے گی تاکہ ساریاں قوماں نُوں گواہی ملے،‏ فیر خاتمہ آئے گا۔‏ (‏متی 24:‏14‏)‏ پر پُوری دُنیا وچ منادی دا ایہہ کم کیویں کیتا جانا سی؟‏ جدوں یسوع مسیح زمین تے سن تے اوہناں نے وکھایا کہ ایس کم نُوں کیویں کرنا اے۔‏—‏لُوقا 8:‏1‏۔‏

اَسی گھر گھر جا کے منادی کرنے آں۔‏ یسوع مسیح نے اپنے شاگرداں نُوں سکھایا کہ اوہ گھر گھر جا کے خوشخبری دی منادی کیویں کر سکدے نیں۔‏ (‏متی 10:‏11-‏13؛‏ اعمال 5:‏42؛‏ 20:‏20‏)‏ پہلی صدی وچ شاگرداں نُوں دسیا گیا سی کہ اوہناں نے کیہڑے کیہڑے علاقیاں وچ منادی کرنی اے۔‏ (‏متی 10:‏5،‏ 6؛‏ 2-‏کُرنتھیوں 10:‏13‏)‏ اَج وی منادی دے کم دا بوہت چنگا انتظام کیتا جاندا اے۔‏ ہر کلیسیا نُوں منادی کرن لئی کجھ علاقے دِتے جاندے نیں۔‏ ایس طرحاں اَسی یسوع دے حکم مطابق سارے لوکاں نُوں چنگی طرحاں گواہی دینے آں۔‏—‏اعمال 10:‏42‏۔‏

سانوں جِتھے وی لوک مِلن اَسی اوہناں نُوں گواہی دین دی کوشش کرنے آں۔‏ یسوع مسیح نُوں جِتھے وی لوک مِلدے سن،‏ اوہ اوہناں نُوں بادشاہی دی خوشخبری سناؤندے سن جیویں کہ کُھوہ کول یاں جھیل دے کنارے۔‏ (‏مرقس 4:‏1؛‏ یوحنا 4:‏5-‏15‏)‏ اَسی وی لوکاں نال ہر تھاں تے بائبل وچوں گل بات کرن دی پُوری کوشش کرنے آں۔‏ ایس لئی اَسی چونکاں،‏ بزاراں،‏ پارکاں وچ یاں فیر ٹیلی فون تے گواہی دینے آں۔‏ ایہدے علاوہ جدوں وی موقع ملے اَسی اپنے نال کم کرن والے لوکاں،‏ گوانڈھیاں،‏ سکول دے ساتھیاں تے رشتےداراں نُوں وی خوشخبری سناؤنے آں۔‏ ایہناں ساریاں کوششاں دی وجہ توں دُنیا بھر وچ لکھاں لوک نجات دا پیغام سُن رہے نیں۔‏—‏زبور 96:‏2‏۔‏

کیہہ تُسی کسے نُوں خدا دی بادشاہی دی خوشخبری سناؤنا چاہندے او؟‏ ذرا سوچو کہ ایہہ خوشخبری سُن کے اوہدا مستقبل کِنّاں سنہرا بن سکدا اے۔‏ ایس لئی خوشخبری اپنے تک ای نہ رکھو سگوں جنی چھیتی ہو سکے دُوجیاں نُوں سناُؤ۔‏

• کیہڑی خوشخبری دا اعلان کرنا بوہت ضروری اے؟‏

• یہوواہ دے گواہ خوشخبری سناؤن لئی یسوع مسیح دی مثال تے کیویں چل رہے نیں؟‏