Manaraq wañuchkaspanmi Jesucristo nirqa: “Diospa [Gobiernonmantam] kay allin noticia willakusqa kanqa enterollan kay pachapi chaynapi llapallan nacionpi runakuna yachananpaq, chayñam kay tiempoqa tukunqa”, nispa (Mateo 24:14). ¿Imaynatam Allpantinpi willakunmanku karqa? Jesuspa predicasqanman hina ruraspankum (Lucas 8:1).

Wasin-wasinmi riniku. Jesusmi qatiqninkunata yachachirqa allin noticiakunamanta wasin-wasin willakunankupaq (Mateo 10:11-13; Hechos 5:42; 20:20). Discipulonkunatam kamachirqa maymanta maykama predicanankupaq (Mateo 10:5, 6; 2 Corintios 10:13). Chaynam ñoqaykupas predicanaykupaq organizasqa kachkaniku, sapa congregacionpim yachaniku maymanta maykama predicanaykupaq kasqanta. Chaynata ruraspam ‘llapallan runakunaman willaspa’ Jesuspa nisqanta kasukuniku (Hechos 10:42).

Maypipas predicanaykupaqmi kallpanchakuniku. Jesuspas runakunapa kasqanpim predicarqa, lamar qochapa patanpi, yaku wisina puquiopa patanpipas (Marcos 4:1; Juan 4:5-15). Ñoqaykupas Bibliamantam willakuniku runakunapa kasqanpi: callekunapi, negociokunapi chaynataq telefonontakamapas. Willakunikutaqmi vecinoykuman, llamkaqmasiykuman, estudiaqmasiykuman hinaspa aylluykumanpas. Chayna rurasqaykuwanmi wara-waranqantin runakuna ‘salvakunapaq’ allin noticiamanta Allpantinpi uyarichkanku (Salmo 96:2).

Diospa Gobiernonwan hamuq tiempopi imayna kawsa kuymanta yachay munaqpi reparay. Amayá qamllapaqchu kachun chay yachasqaykikunaqa, hukkunamanpas chayllayá willakuy.

• ¿Ima ‘allin noticiakunamantam’ willakuna?

• ¿Imaynatam Testigokunaqa qatipakuniku Jesuspa imayna predicasqanta?