Pai huañuna punlla ña pactarijujpimi Jesusca nirca: Diospa Reinomanda ali villaicunataca “cai pachapi tiaj tucui llactacunapi causajcuna yachachunmi villanajunga”. Chai jipami tucurimuica chayamunga nishpa (Mateo 24:14). ¿Imashinata tucui llactacunapi villachina carca? Jesús cai Alpapi cashpa imashina villachishcata catishpami villachina carca (Lucas 8:1).

Gentecunataca paicunapa huasipillatami visitapanchi. Jesusca paipa punda catijcunataca huasin huasin rishpa villachichunmi yachachirca (Mateo 10:​11-13; Hechos 5:42; 20:20). Paicunamanga maicunapilla villachinatapashmi ali ricuchirca (Mateo 10:​5, 6). Cunan tiempopipashmi maicunapilla villachinataca ali yachanchi. Chaimandami cada congregación ali yachan maijan territoriocunapilla villachina cashcata. Shinami Jesús madashcata cazushpa gulpi gentecunaman villachita ushapanchi (Hechos 10:42).

Tucui ladocunapimi gentecunahuan parlapanchi. Jesusca mar manñacunapipash yacu pozo ladopipashmi gentecunaman villachirca (Marcos 4:1; Juan 4:​5-15). Ñucanchipash callecunapi, almacengunapi, parquecunapi, telefonoman cayashpapashmi gentecunahuanga Bibliamanda parlapanchi. Shinallata vecinocunaman, trabajo o escuela compañerocunaman, ñucanchi rijsicunamanbashmi Diosmanda parlapanchi. Tucui ladocunapi villachishcamandaca mundo enteropi ashtaca ashtaca gentecunami quishpichij ali villaicunataca uyashca (Salmo 96:2).

Diospa Reinomanda ali villaicunata yachana, shamuj punllacunapi imashina ayudanataca ¿pimanda villachingapaj munapanguiman? Chai ali villaicunataca na quiquinlla yachanachu capangui. Uchallami shujcunamanbash villachina capangui.

• ¿Ima ‘ali villaicunatata’ villachina capanchi?

• Testigo de Jehovacunaca ¿imashinata Jesuspa ejemplota catishpa villachipanchi?