Taloha ty nahafaty Jesosy le nivola ie hoe: ‘Sady hotoria amy tany toy iaby ty vaovao soa mikasiky fanjakà io, ho vavolombelo amy firenena iaby, vo ho avy ty farany.’ (Matio 24:14) Fe manao akory ty hahavità fitoria io amy tany toy iaby? Amy fanoriha ty raha nanovy Jesosy tamy ie tan-tany etoy.—Lioka 8:1.

Mamonjy olo an-trano zahay. Nampianary Jesosy hamonjy olo an-trano ty mpanoridia azy lafa mitory. (Matio 10:11-13; Asan’ny Apostoly 5:42; 20:20) Namea faritany voafaritsy soa nitoria ty mpitory tamy taonjato voalohany. (Matio 10:5, 6; 2 Korintianina 10:13) Voalamy soa manahaky zay koa zahay henanizao, satria samby namea faritany iasany iaby ty fiangona kiraidraiky. Mahavy anay hanoriky ty safà Jesosy hoe ‘hitory noho hanazava soa aminolo’ ty vaovao soa raha zay.—Asan’ny Apostoly 10:42.

Mila olo zahay ndre aia ndre aia ahità azy. Misy ohatsy soa koa nengà Jesosy satria nitory tamy ze pilasy nahitany olo ie. Nitory tamy sisy riaky iny noho tamy vovo fantsakanolo maro ohatsy ie. (Marka 4:1; Jaona 4:5-15) Manao manahaky zay koa zahay, mitory amy ze pilasy misy olo, ndre an-dalavato eny io, ndre amy trano fiasa na amy zariday na mitory amy telefony. Mitory aminolo mifankariny trano, miharo fianara, miaraky miasa aminay noho ty longonay koa zahay, lafa afaky manao raha zay. Raha iaby anovy rezay ro mahavy ty olo an-tapitrisany amy tany toy, haharè ty ‘vaovao soa mikasiky ty famonjea.’—Salamo 96:2.

Misy olo teanao iresaha vaovao soa mikasiky Fanjakà Ndranahary io noho ty raha soa ho azo baka amy raha io va? Ka tanjahy ho ahinao raiky avao vaovao soa io, fa volano aminolo farany ze malaky.

• Ino ty ‘vaovao soa’ mila toria?

• Manao akory ty anoriha ty Vavolombelo Jehovah ty ohatsy nengà Jesosy tamy asa fitoria?