Er zurum u Yesu una kpe la, a yôô wener: “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.” (Mateu 24:14) Kpa lu u a er nan ve a yôô loho u dedoo ne a tser tara? Lu u a dondo ikyav i Yesu ver shighe u lu shin tar la.—Luka 8:1.

Ka se nongo ser se zua a ior sha uya vev. Yesu yange tsaase mbahenen nav sha u ve pasen loho u dedoo ne sha uya uya. (Mateu 10:11-13; Aerenakaa 5:42; 20:20) Yange i tese mbapasen ivangeli mba sha ayange a mbaapostoli la ajiir a vea za pase kwagh her la jighilii. (Mateu 10:5, 6; 2 Mbakorinte 10:13) Kape nyian kpa i eren tom wase u pasen kwagh la sha inja sha inja, shi hanma tiônnongo a lu a ijiir na i a pasen kwagh her je la. Kwagh ne ka a wase se u eren kwagh u Yesu yange kaa a vese ér ‘se̱ ôr ior kwaghaôndo, shi se̱ pase’ ve kwagh kpoghuloo la.—Aerenakaa 10:42.

Ka se nôngo ser se zua a ior hanma ijiir i ve lu cii. Yesu yange ver se ikyav igen kpaa. Yange pasen ior kwagh sha ajiir a ior banen her ga yô, er hen kpezegemnger shin hen kpejôr nahan. (Marku 4:1; Yohane 4:5-15) Se kpa se mba lamen a ior sha kwagh u Bibilo hanma ijiir i ve lu cii, sha ugodobi shin sha ajiir a eren kasua shin sha ajiir a memen, shi se mba lamen a ior sha telefon kpaa. Shi shighe u ian i dugh cii yô, ka se pase mbawanndor a vese man mba se eren tom ijiir i môm man mba se ze makeranta môm man anmgbianev asev kwagh. Iniôngon yase ne cii na yô, ior umiliôn imôngo sha tar cii ungwa loho u dedoo u sha “kwagh u myom” la.—Pasalmi 96:2.

Ma or ngu u ú nenge wer doo u ú pase nan loho u dedoo u sha kwagh u Tartor u Aôndo la, kua averen a loho shon ua va nan a mi ken hemen la yôô? De hidi ijime u pasen ior loho u nan se ishimaverenkeghen ne ga. Pase ve u fese je, er u fetyô la cii!

• Ka “loho u dedoo” u nyi i gbe kpee u se pase?

• Mbashiada mba Yehova mba dondon ikyav i Yesu i pasen kwagh la nena?