LĒSONI 12
‘Oku Anga-Fēfē Hono Fokotu‘utu‘u Maau ‘Emau Ngāue ko Hono Malanga‘i ‘a e Pule‘angá?
Taimi nounou ki mu‘a ‘i he‘ene pekiá, na‘e fanongonongo ‘e Sīsū: “Ko e ongoongo lelei ko ‘eni ‘o e Pule‘angá ‘e malanga‘i ia ‘i he kotoa ‘o e māmani kuo nofo‘í ko ha fakamo‘oni ki he ngaahi pule‘anga kotoa pē, pea ‘e toki hoko mai ‘a e ngata‘angá.” (Mātiu 24:14) Ka ‘e fakahoko fēfē ‘a e ngāue fakamalanga ko eni ‘i he fo‘i kolopé? ‘I he muimui ki he sīpinga na‘e fokotu‘u ‘e Sīsū ‘i he taimi na‘á ne ‘i māmani aí.—Luke 8:1.
‘Oku mau feinga ke fetu‘utaki mo e kakaí ‘i honau ngaahi ‘apí. Na‘e ako‘i ‘e Sīsū ‘ene kau ākongá ke nau malanga‘i ‘a e ongoongo leleí mei he fale ki he fale. (Mātiu 10:11-13; Ngāue 5:42; 20:20) Ko e kau ‘evangeliō ko ia ‘i he ‘uluaki senitulí na‘e vahe‘i kiate kinautolu ‘a e ngaahi feitu‘u ngāue makehe ke nau malanga ai. (Mātiu 10:5, 6; 2 Kolinitō 10:13) ‘Oku pehē pē ‘i he ‘ahó ni, ko ‘emau ngāue fakamalangá ‘oku fokotu‘utu‘u maau lelei ia, pea ko e fakataha‘anga taki taha ‘oku ‘oange ki ai ha feitu‘u kuo ‘osi vahe‘i ke nau ‘osiki. ‘Oku ‘ai ai heni ke mau malava ‘o fakahoko ‘a e fekau ‘a Sīsū ke “malanga ki he kakaí pea ke fai ha fakamo‘oni faka‘āuliliki.”—Ngāue 10:42.
‘Oku mau feinga mālohi ke a‘u ki he kakaí ‘i ha feitu‘u pē ‘e lava ke ma‘u ai kinautolu. Na‘e toe fokotu‘u ‘e Sīsū ‘a e fa‘ifa‘itaki‘angá ‘aki ‘ene malanga ki he fa‘ahinga ‘i he ngaahi feitu‘u kakaí, hangē ko ia ‘i he matātahí pe ‘i ha vaitupu ‘i he koló. (Ma‘ake 4:1; Sione 4:5-15) ‘Oku mau talanoa foki ki he kakaí fekau‘aki mo e Tohi Tapú ‘i ha feitu‘u pē ‘e malava ai—‘i he ngaahi halá, ‘i he ngaahi feitu‘u pisinisí, ‘i he ngaahi pa‘aké, pe ‘i he telefoní. ‘Oku mau toe faifakamo‘oni foki ki homau ngaahi kaungā‘apí, kaungāngāué, kaungāakó, mo e ngaahi kāingá ‘i he taimi ‘oku mau ma‘u ai ha faingamālie fe‘ungamālié. Ko e fakatahataha‘i ‘o e ngaahi feinga kotoa ko ení kuo ‘ai ai ke malava ‘a e kakai ‘e laui miliona ‘i māmani lahi ‘o fanongo ki he ‘ongoongo lelei ‘o e fakamo‘uí.’—Saame 96:2.
‘E lava ke ke fakakaukau fekau‘aki mo ha taha te ke sai‘ia ke vahevahe ki ai ‘a e ongoongo lelei ‘o e Pule‘anga ‘o e ‘Otuá pea mo e ‘uhinga ‘o e ongoongo ko iá ki honau kaha‘ú? ‘Oua ‘e tuku pē ‘iate koe ‘a e pōpoaki ‘o e ‘amanaki ko ení. Vahevahe ia kiate kinautolu ‘i he vave taha te ke malavá!
-
Ko e hā ‘a e “ongoongo lelei” kuo pau ke fanongonongó?
-
‘Oku anga-fēfē fa‘ifa‘itaki ‘a e Kau Fakamo‘oni ‘a Sihová ki he founga malanga ‘a Sīsuú?