Өлүрүнүң мурнуу чарыында Иисус: «Дээрниң Чагыргазының дугайында бо Буянныг Медээни бүгү делегейге, хамык чоннарга медеглээн турар, бүгү чүвениң төнчүзү чүгле ооң соонда кээр» — деп чугаалаан (Матфей 24:14). Ынчаарга буянныг медээ бүгү делегейге дыңналы бээр кылдыр, чүнү канчаар болза эки? Иисустуң арттырган үлегерин эдергеш, ону чедип ап болур (Лука 8:1).

Улус бажыңнарынга турар үеде чеде бээрин кызып турар бис. Иисус өөреникчилерин бажыңнар кезип тургаш, буянныг медээни суртаалдаар кылдыр өөредип турган (Матфей 10:11—13; Ажыл-чорудулга 5:42; 20:20). Бирги векте суртаалчылар, тускай аңгылаттынган, суртаалдаар девискээрлиг турган (Матфей 10:5, 6; 2 Коринфичилерге 10:13). Бөгүн база бистиң ажыл-чорудулгавыс дыка эки организастаттынган. Хурал бүрүзүнде томуйлаттынган девискээр бар. Ооң ачызында Иисустуң суртаалдаар база херечилээр дээн даалгазы күүсеттинип турар (Ажыл-чорудулга 10:42).

Кижилер кайда бар болдур, ында суртаалдап турар бис. Иисус колдуунда хөй чон чыглыр черлерге суртаалдап турган, чижээ, хөл эриинге азы кудук чанынга (Марк 4:1; Иоанн 4:5—15). Ооң үлегерин эдерип, бис база кижилер-биле Библия дугайында улус кайда бар болдур: кудумчуга, ажыл-агый төптеринге, парктарга, безин телефон таварыштыр чугаалажырын кызыдып турар бис. Оон аңгыда, эптиг байдал тургустунарга-ла, кожаларывыска, кады ажылдап турар эштеривиске, чаңгысклассчыларывыска база төрелдеривиске херечилеп турар бис. Ооң ачызында бүдүн делегейде сая-сая кижилер камгалал дугайында буянныг медээни дыңнап турар (Ырлар 95:2).

Бурганның Чагыргазының дугайында база кайгамчыктыг келир үе дугайында буянныг медээни кымның-биле үлежип болур силер? Ол билиглерни бодуңарга шыгжаваңар. Арга тыптып кээрге-ле, өскелер-биле ооң дугайында үлежиңер!

• Бүдүн делегейге кандыг медээ дыңналыр ужурлугул?

• Иегованың Херечилери Иисустуң арттырган үлегерин канчаар эдерип турарыл?