Ọmọke krẹn tavwen Jesu ki rhi ghwu, ọ da ta: “Ka cha ta ota rẹ iyẹnrẹn esiri na wan akpọ na ejobi, rere ọ vwọ dia iseri kẹ ẹgborho na ejobi: tavwen rẹ oba na ki rhi te.” (Matiu 24:14) Mavọ yen e se vwo ghwoghwo ota na ro akpọneje? E se ruo, siẹrẹ e de nene udje rẹ Jesu phi phiyotọ ọke rọ vwọ hẹ otọrakpọ na.​—Luk 8:1.

Avwanre bru ihwo kpẹ uwevwin rayen. Jesu yono idibo rọyen nẹ ayen ghwoghwo iyẹnrẹn esiri na nẹ uwevwin kpẹ uwevwin. (Matiu 10:11-13; Iruo 5:42; 20:20) Ighwoghwota rẹ ẹgbukpe ujorin ẹsosuọ vwo ẹkuotọ rẹ ayen de ghwoghwo. (Matiu 10:5, 6; 2 Kọrẹnt 10:13) Nonẹna, avwanre ji vwo ọrhuẹrẹphiyotọ re vwo ruiruo aghwoghwo na; ukoko ọvuọvo vwo ẹkuotọ ro de ghwoghwo. Ọnana nẹrhẹ avwanre se ruẹ nene iji ri Jesu, rọ vwọ tanẹ, “e ghwoghwo kẹ ihwo, re ji se oseri” ro fiotọ kẹ ayen.​—Iruo 10:42.

Avwanre guọnọ ihwo kpẹ kasan kasan rẹ ayen hepha. Jesu phi udje phiyotọ kẹ avwanre ro vwo ghwoghwo ota kẹ ihwo vwẹ azagba, kerẹ udje, o ghwoghwo vwẹ orhoma rẹ urhie vẹ orhare. (Mak 4:1; Jọn 4:5-15) Avwanre ji ghwoghwo ota kẹ ihwo vwẹ kasan kasan; vwẹ urhuvwun, eki, asan rada heha, yẹrẹ womarẹ ifonu. Siẹrẹ uphẹn de rhiephiyọ, avwanre ji ghwoghwo ota kẹ ihwo rẹ egodo avwanre, ihwo orua avwanre, ihwo re vẹ avwanre gbe ruiruo, yẹrẹ ihwo rẹ isikuru avwanre. Fikirẹ ọnana, iduduru rẹ ihwo vwẹ akpọneje ki se nyo “ikun rẹ esivwo” na.​—Une Rẹ Ejiro 96:2.

O vwo ohwo ru wọ guọnọ vuẹ kpahen iyẹnrẹn esiri rẹ Uvie rẹ Ọghẹnẹ kugbe ebruphiyọ rọ cha ghwa rhe? Reyọ kuphẹn kuphẹn ro rhiephiyọ vwosn ghwoghwo ota na kẹ ihwo!

• “Iyẹnrẹn esiri” vọ yen e che ghwoghwo?

• Mavọ yen Iseri ri Jihova vwo nene udje rẹ aghwoghwo ri Jesu?