Han hirani na mamatay hi Jesus, hiya nagsiring: “Ini nga Maopay nga Sumat han ginhadian igwawali ha bug-os nga kalibotan ha pagpamatuod ha ngatanan nga mga nasud; ngan niyan an kataposan maabot.” (Mateo 24:14) Kondi paonan-o bubuhaton inin pagsangyaw ha bug-os nga kalibotan? Pinaagi ha pagsunod han ginbuhat ni Jesus han nakanhi pa hiya ha tuna.—Lukas 8:1.

Ginbibisita namon an mga tawo ha ira balay. Ginbansay ni Jesus an iya mga disipulo ha pagbalay-balay basi isangyaw an maopay nga sumat. (Mateo 10:11-13; Buhat 5:42; 20:20) Gintagan niya hira hin mga teritoryo nga sasangyawan. (Mateo 10:5, 6; 2 Korinto 10:13) Ha pariho nga paagi, organisado gihap an amon pagsangyaw nga buruhaton yana nga an tagsa nga kongregasyon may nakatoka nga teritoryo. Hini nga paagi, natutuman namon an sugo ni Jesus nga ‘magwali ha katawohan ngan magtestigo’ hin bug-os.—Buhat 10:42.

Nangangalimbasog kami nga makaistorya an mga tawo diin man hira mabibilngan. Hi Jesus nagsangyaw ha panpubliko nga mga lugar, sugad han ha baybayon ngan ha hirani hin atabay. (Markos 4:1; Juan 4:5-15) Ha pariho nga paagi, nakikiistorya kami mahitungod han Biblia ha bisan diin nga posible—ha kalsada, komersyal nga lugar, parke, o ha telepono. Nagsasangyaw liwat kami ha amon amyaw, katrabaho, kaklase, ngan paryente kon angayan ha higayon. Tungod hini nga mga pangalimbasog, minilyon ha bug-os nga kalibotan an nakakabati han maopay nga sumat han “kaluwasan.”—Salmo 96:2.

May-ada ka ba nahuhunahuna nga karuyag mo sumatan han maopay nga sumat han Ginhadian han Dios ngan han magigin epekto hito ha ira tidaraon? Isumat ini ha ira samtang may panahon pa!

• Ano nga “Maopay nga Sumat” an kinahanglan isangyaw?

• Paonan-o ginsusubad han mga Saksi ni Jehova an paagi ni Jesus ha pagtutdo?