Toj tatay lhimphaj che yʼil Jesús, yome pʼante toja: «Nʼosilätyaj tä Isna tä yäme Dios Niyatyaj õʼwohla silätaʼpe imälhewek honhat yämthilek nilhokej wichi tä ihiche honhates iläte. Wet nechʼe häpkhilek näm lepes» (Mateo 24:14). ¿Chi nʼowoyneje toj nʼowo silota imalhewek honhat? Malhyej at iwoye mʼak toj Jesús iwoye pʼante lewhay toj iʼpe honhatna (Lucas 8:1).

Olhamel ohoye weihalhapej wichi toj ihi lewʼet. Jesús ichufwenej pʼante lechufwenkay toj yen lhometa nʼosilotyaj toj isis, ihoye weihalhapej wichi toj ihi lewʼetes (Mateo 10:11-13; Apóstoles Lhenhay 5:42; 20:20). Nʼosilotyajwostso toj ichun, nʼofwenho pʼante tʼat lhip toj kalelhaj toj is che lhamel yen lepesa toj ihi toj iwo lhometa (Mateo 10:5, 6; 2 Corintios 10:13). Malhyej iwoye athana, olhamel toj owo lhometa matche toj kalelhajcha, wet weihalhapej congregación hiwʼen lhip toj ihi toj lhamel is che iwo lhometa toj lepes iche. Toj olhamel owoye tajtso, iwoyek otahuyej wujpey wichi, olhaikhajyenejen tʼat mʼak toj Jesús yome pʼante toj is che olhamel owoye toj «oyen lhämeta Dios Silätyaj tä Is» (Apóstoles Lhenhay 20:24).

Olhamel olhaikhajyenej hopkhilak ohoye wichi toj ihi lhip at che hope. Hate Jesús ipayen namehen chi pʼante iwoyneje toj iwo silotyaja toj ihi toj wichi tatache, malhyej toj iwhaye lewomek wok nʼopek toj ihi hupuy (Marcos 4:1; Juan 4:5-15). Malhyej at iwoye ifwalasna olhamel ofwenho wichi mʼayhay toj ihi Biblia tej toj ihi lhip at che hope: ihi nʼayij, ihi lhip toj lhamel ihoye toj tʼukwe laka chinaj tʼoj, ihi kachawʼet wok olhamel ochumyenlhi teléfono. Hate, lewhay che iwoye, olhamel ofwenho mʼayhay toj olhamel otʼekhachʼoye wichi toj iwhaye olhamel owʼet, olhamel otʼunfwas toj ihoye nʼochufwenyajwʼet wet opunfwas. Toj isej tajtso, nʼofwenho wujpey wichi nʼosilotyaj toj isis «lefwayhyaj» (Salmo 96:2).

Tichunejlhi nʼoelh at che hope toj lehuminchek lefwenho nʼosilotyajay toj isis toj talhe Dios Niyatyaj wet chi malhyej toj yʼaje lewhayis toj tataye. Yej nʼayejo wichi iyhaj hop nʼosilotyajna toj nʼoniwhayaj. Lewhay che iwoye, iwoyek letafwnhatej iyhaj wichi.

• ¿Atsi toj hope «Nʼosilätyaj tä Isna» toj is che nʼoyen lhometa?

• ¿Atsi mʼayhay toj Jesús iwoye pʼante toj iwo lhometa toj wichi toj yen lhometa Heowa naten?