Tekila Yesu kafua, wutuba: “Buna Nsamu wawu wumboti wu Kimfumu wela longo va nza yimvimba mu diambu di wuba kimbangi kuidi batu ba makanda ma zitsi zioso. Buna bosi tsukulu yi nza yela ba.” (Matayi 24:14) Buabu, bue kisalu beni kifueti salimina e? Mu landakana kifuani kioki Yesu katubikila bo kaba va ntoto.—Luka 8:1.

Tueta tula ngolo mu kue bati batu mu zinzo ziawu. Yesu wumonisa minlongoki miandi phila yo bafueti samunina nsamu wumbote nzo ka nzo. (Matayi 10:11-13; Mavanga 5:42; 20:20) Minsamuni mio mithete babavana bibuangu bio bafueti samunina. (Matayi 10:5, 6; 2 Kolinto 10:13) Phila mosi ayi buabu, kisalu kieto ki tsamununu kibongusulu mbote, ayi kieta vana kimvuka kimosimosi buangu kio kifueti samunina. Mu phila beni, tueta longisa mambu momo Yesu katinda “tulonga batu ayi tutelama kimbangi.”—Mavanga 10:42.

Tueta tula ngolo mu kue babati koso koko badi. Yesu phe wutubikila kifuani mu phila yoyi tufueti samunina mu bibuangu bioso bidi batu, dede mu mabongo, va dibulu ditekila maza. (Malako 4:1; Yoane 4:5-15) Beto phe tueta solula ayi batu mambu ma Bibila mu bibuangu bioso: mu zibalabala, mu mazandu, ayi mu nzila telefone. Tueta samunina ayi batu bo bafikimini yeto, bakundi beto ba kisalu, ayi bakundi beto ba nzo-nkanda, bakhomba zieto mu dibuta, ti diluaku dimonikini. Ngolo zioso zio tueta tula zitudidi ti batu bawombo mu nza yimvimba bawa ‘nsamu mbote wu phulusu andi.’—Nkunga 96:2.

Wudi ayi na mutu mosi nio wulenda samunina nsamu wumbote wu Kimfumu ki Nzambi ayi mambote mo kiela kunatina mu bilumbu binkuiza? Kadi lunda nsamu wumbote mu diambu di ngeyo veka. Tona kamba batu nsamu beni nsualunsualu!

• “Nsamu wumbote” mbi tufueti samuna?

• Bue Zimbangi zi Yehova beta landikinina phila yoyi Yesu kasamunina?