Odwokɔ pɔkɔ mɔɔ mɛyɩ yɛ lɛ “ɔhʋanɩbukolɛvʋlɔ” nɩ ikile mmenii mɔɔ bɛpɩbɛ azɩlɛ-sini mvʋlɔ nu na bopuko ahʋanɩ betiã ɛkɛnɩ bɛma ebiyemmɔ sʋ̃ ma boduwa ɔzʋlɔ. Nɩ Gyisɛsɩ ɩdɩ kɛɛ ɔhʋanɩbukolɛvʋlɔ, bɔzʋ̃manlɩ yɩ ma ɩɣalɩ azɩlɛ ɩzʋ kɛɛ ɩɣa ɩyɛ nnwʋanlɩ-manlɛ ɔzʋ̃mɩnlɛ egyima yɩ na ɩawuko ɔhʋanɩ ɩama adasamaa bɛ nnwʋanlɩlelɛ. (Matiyu 20:28) Nnɛ sʋ̃, yɩ mɛdalilɛmaa bosumazuma yɩ, iluwa mmɩlɩ sʋ̃maa mɔɔ bɛlɛ ‘bɛyɛ mmenii yɩ adʋwavʋlɔ’ nɩ zʋ. (Matiyu 28:19, 20, NW) Ebiyemmɔ sʋ̃ bɛva bɔnwʋ bowula mɔɔ bɔfʋlɔ yɩ kɛɛ ɔhʋanɩbukolɛvʋlɔ egyima yɩ nɩ nu.

Ɔhʋanɩbukolɛvʋlɔ ɩdɩ abiye mɔɔ ɩyɛ odwokɔhanlɛ egyima yɩ nɩ mmɩlɩ munwatĩĩ. Gyehova Dasɩvʋlɔmaa munwala bɛdɩ odwokɔba yɩ nwʋ ɛlawulowɔlɛmaa. Naasʋ̃, ebiyemmɔ bɛhyɩhyɛ bɛ nninyeni bʋwɔ wɔ bɛ azɩwʋwalɛ nu ma bɔsʋ̃mɩ kɛɛ eɣile munwatĩĩ ɔhʋanɩbukolɛmaa, na bɛfa dɔnɩhwɩlɩ 70 wɔ eziyianɩ bela nu bɛyɛ odwokɔhanlɛ egyima yɩ nɩ. Sɛ bɔkɔhʋla bɛkɛyɛ eyi a, bonu sʋ̃maa bɛtɩ bɛ egyima zʋ, na bɛfa mmɩlɩ yɩ ɔfʋã bɛyɛ egyima. Bɛyɩ ebiyemmɔ sʋ̃ kɛɛ ɔhʋanɩbukolɛmaa titili wɔ nnɩka mɔɔ behyinyia Bulomnumlililɛ yɩ nwʋ ɛlawulowɔlɛmaa sʋ̃maa nɩ, na bɛfa dɔnɩhwɩlɩ 130 anzɛnyɩɩ mɔ ɩbʋ ɔzɔ bɛyɛ ɔzʋ̃mɩnlɛ egyima yɩ wɔ eziyianɩ bela nu. Ɔzɔ ɔhʋanɩbukolɛmaa yɩ nɩ bokunlu itwoli ɛgyɩkɩ̃ɩ̃ mɔɔ bɔwɔ bela nwʋ, na bede bedi kɛɛ Gyehova ɩkɛva mɔɔ behyinyia bela wɔ bɛ ɛbɩlawɔlɛ nu nɩ ɩkɛma bɛ. (Matiyu 6:31-33; 1 Timoti 6:6-8) Mmenii mɔɔ bɔlɔ́kʋla bɛkɛyɛ ɔhʋanɩbukolɛ egyima yɩ mmɩlɩ munwatĩĩ nɩ, bɔkɔhʋla bɔkɔzʋ̃mɩ kɛɛ ɔhʋanɩbukolɛ awʋwavʋlɔ mmɩlɩ mɔɔ bɔkɔhʋla bɛkɛyɛ ɔzɔ, ɩma betiã mmɩlɩ mɔɔ bɛfa bɛkã odwokɔ yɩ nu bɔkɔ dɔnɩhwɩlɩ 30 anzɛnyɩɩ 50 wɔ eziyianɩ bela nu.

Ɔlɔlɛ mɔɔ abiye ɩwɔ ɩma Nyamɩnlɩ nɩɩ mmenii yɩ nɩ yɛ ɩkã yɩ ma ɩba ɩyɛ ɔhʋanɩbukolɛvʋlɔ a. Dɩkɛ Gyisɛsɩ nɩ, amɩyɛzayɛ sʋ̃ yɛnwʋ kezimɔ mmenii sʋ̃maa behyinyia kɛɛ bɔnwʋ odwokɔ mɔɔ ɩfalɩ Nyamɩnlɩ nɩɩ itile nu pɔkɔ mɔɔ ɩwɔ ɩma adasamaa yɩ nɩ nwʋ. (Maakɩ 6:34) Naasʋ̃ yɛwɔ nnimidi mɔɔ ɩkɔhʋla ɩkɔwʋwa bɛ sikalɛpɛyɩ, mɔɔ ɩkɛma bekenyia eɣile be nwʋ anyɩnlɩlazʋ baaba. Ɔlɔlɛ mɔɔ ɩwɔ ɩma yɩ ɔhɔnwʋ yɛɛ ɩkã ɔhʋanɩbukolɛvʋlɔ ma ɩfa yɩ mmɩlɩ nɩɩ yɩ anwʋzɩzɩbɛ ɩbʋwa mmenii ma bɛba bɔnwʋ odwokɔba yɩ nɩ a. (Matiyu 22:39; 1 Tɛsalonikamaa 2:8) Iluwa eyi zʋ nɩ, ɔzɔ ɔhʋanɩbukolɛvʋlɔ nɩ ɩhyɛ yɩ dedi nu ɛzɩzɩbɛ, ibike Nyamɩnlɩ, na inyia anyɩnlɩlelɛ sʋ̃maa.—Egyima 20:35.

• Aninyia yɛ lɛ ɔhʋanɩbukolɛvʋlɔ a?

• Mɩnla yɛɛ ɩkã ebiyemmɔ ma bɛfa bɛ mmɩlɩ munwatĩĩ bɛyɛ ɔhʋanɩbukolɛvʋlɔ a?