Wi ba ra soku “swaa gbiiyo” u sãawa wi u tem kpam beramɔ kpa u ka gabu yen swaa wukia. Sa ko kpĩ su Yesun tii soku swaa gbiiyo, yèn sɔ̃ ba wi gɔrima temɔ ‘u ka tɔmbu sã’ kpa u be faaba kobun swaa wukia. (Mateu 20:28) Gisɔn tɔ̃ru, tɔn be ba wi swĩi, ba wi saarimɔ, ba saa baka dimɔ ba ka ‘bwãabu mɔ̀.’ (Mateu 28:19, 20) Gabu ba ra ben saa sue bu ka ye sa sokumɔ swaa gbiiyon sɔmburu ko.

Swaa gbiiyo u sãawa wi u ra waasu ko saa gira. Yehofan Seeda Diobu kpuro ba sãawa labaari gean kparobu. Adama, gaba ra hania ko bu ka fɛɛ wa bu kɔbi 70 wa waasu sɔɔ suru baawure; bera ba ra soku: swaa gbiiyobu kiri kiri. Bu ka kpĩ bu waasu koo bin bweserun saa wa, ben dabina ra kookari ko bu ka ben nɔman sɔma kawa. Ba maa gabu gɔsa bu ka ko swaa gbiiyo gɔro tem mi ba Bandun garin waasu kowobun bukata mɔ; ba kɔbi 130 gasɔ ka sɔndiru yibiamɔ waasu sɔɔ suru ka suru. Swaa gbiiyo be, ba ra ben wãaru di saka sɔɔ, ba sire ma Yehofa u koo yèn bukata ba mɔ yibia. (Mateu 6:31-33; 1 Timɔte 6:6-8) Be ba ǹ kpɛ̃ ba n sãa swaa gbiiyo saa gira, ba koo kpĩ bu ko swaa gbiiyo dɛro bà n ayeru wa; ben waasu kobu sɔɔ, ba ra kɔbi 30 ǹ kun mɛ 50 yibie suru sɔɔ.

Kĩi te ba Yehofa ka tɔmbu mɔwɛn saabuwa ba ra ko swaa gbiiyo. Sa wa ma tɔn dabina Gusunɔ ka win swɛɛn bukata mɔ, mɛya Yesun tii u raa ye wa sanam mɛ u wãa temɔ. (Maaku 6:34) Wee, sa yɛ̃ɛ te ta koo bu faaba ko mɔ, te ta ko bu yĩiyɔ geebu kɛ̃ sian sɔ̃. Tɔnusin kĩrun saabuwa swaa gbiiyobu ba ka nuku tia ben saa ka ben dam loo mɔ̀, bu ka tɔmbu somi bu ka wa bu labaari gea ye gia. (Mateu 22:39; 1 Tɛsalonika 2:8) Arufaani yirà swaa gbiiyo be, ba mɔ? Ben naanɛ dokebu koo dam ko, kpa bu Gusunɔ susi bu sosi, ba koo maa nuku dobu nɔ too.—Gɔrobun kookoosu 20:35.

• Warà ra n swaa gbiiyo?

• Mba n saabuwa swaa gbiiyo ba ra ben saa gira sue bu ka waasu ko?