Tuma caman na “tutigɛbaga” bɛ fɔ walasa ka kuma mɔgɔ kan min bɛ ɲɛɲinini kɛ yɔrɔ kuraw kan, o min bɛ kɛ sababu ye ka sira dayɛlɛ mɔgɔ wɛrɛw ye. An bɛ se k’a fɔ ko Yesu tun ye tutigɛbaga ye ka d’a kan a cira ka na dugukolo kan walasa k’a daminɛ ka waajuli kɛ ani ka kisili soroli sira dayɛlɛ hadamadenw ye. (Matiyu 20:28) Bi bi in na, a ka kalandenw bɛ a ladege u kɛtɔ ka waati caman ta ka mɔgɔ wɛrɛw ‘kɛ kalandenw’ ye. (Matiyu 28:19, 20) O la, mɔgɔ dɔw sera ka tutigɛbagaya baara ta.

Mɔgɔ don min bɛ waajuli kɛ waati bɛɛ. Jehova Seere bɛɛ bɛ kibaru duman welewele dali kɛ. Dɔw ye labɛnw kɛ walasa ka kɛ tutigɛbaga basigilenw ye ni o ye ka waajuli kɛ kalo kɔnɔ lɛrɛ 70. Walasa ka se ka o kɛ, tuma dɔw la, baara min tɛ u ka waati bɛɛ ta, u bɛ dan o kɛli dɔrɔn ma. Waajulikɛlaw man ca yɔrɔ minnu na, dɔw bɛ bila ka taa yen i n’a fɔ tutigɛbaga kɛrɛnkɛrɛnnenw ye, olu bɛ waajuli kɛ lɛrɛ 130 la kalo kɔnɔ. Ɲɛnamaya kɛcogo nɔgɔnma bɛ tutigɛbagaw wasa, u jigi b’a kan k’u mago bɛ fɛn minnu na Jehova bɛ o di u ma. (Matiyu 6:31-33; 1 Timote 6:6-8) Minnu tɛ se ka waajuli kɛ waati bɛɛ, olu bɛ se ka kɛ tutigɛbaga farankanw ye, u kɛtɔ ka kalo dɔ sugandi u bɛ waajuli kɛ min kɔnɔ lɛrɛ 30 walima 50 kɔnɔ.

Mɔgɔ don min bɛ o kɛ ka d’a kan Ala ani a mɔgɔ ɲɔgɔn kanu b’a la. I n’a fɔ Yesu, an ye a jateminɛ ko tiɲɛ yɛrɛ la mɔgɔ caman mago b’a la ka Ala dɔn bi. (Marka 6:34) Nka an dun bɛ min dɔn o bɛ se ka u dɛmɛ kabini sisan ani ka jigiya kɔgɔlen di u ma. Mɔgɔw kanuya kosɔn tutigɛbaga bɛ a ka waati ni a fanga di walasa ka mɔgɔw ladɔnniya Ala ka kibaru duman na. (Matiyu 22:39; 1 Tesalonikekaw 2:8) O kosɔn a ka dannaya bɛ kɔgɔ, a bɛ gɛrɛ Ala la ani a bɛ nisɔndiyaba sɔrɔ.—Kɛwalew 20:35.

• Tutigɛbaga ye mun ye?

• Mun bɛ u bila tutigɛbagaya kɛli la?