Istilah ”perintis” megati igunaken kempak kalak si lawes ku daerah si mbaru janah mbuka dalan man kalak si deban. Jesus pe banci igelari sekalak perintis perbahan ia iutus ku doni guna ngelakoken pelayanen janah mbuka dalan guna keselamaten. (Matius 20:28) Genduari, ajar-ajarna pe ngusih ia alu nggunaken melala waktu guna ’njadiken ajar-ajar’. (Matius 28:19, 20) Ras, piga-piga banci ikut i bas pelayanen si igelari kami dinas perintis.

Perintis eme perberita si meriah si enggo netapken jumlah waktuna lako erberita. Saksi Jahwe kerinana nge perberita si meriah. Tapi, lit si nesuaiken keadanna gelah banci ngelayani jadi perintis biasa, si nggunaken 70 jam tep-tep bulan i bas dahin erberita. Gelahna banci bage, melala si kentisik ngenca ia erdahin tep-tep wari. Si debanna lit si itugasken ngelayani jadi perintis istimewa i daerah si lebih iperluken perberita Kinirajan i je. Kalak e mereken waktuna 130 jam ntah pe lebih i bas pelayanen tep-tep bulan. Perintis-perintis enda puas nggeluh sederhana, janah tek maka isediaken Dibata Jahwe keperlunna. (Matius 6:31-33; 1 Timotius 6:6-8) Ise si la banci jadi perintis biasa ntah pe perintis istimewa banci ngelayani jadi perintis ekstra adi keadanna memungkinken, alu ikut mberitaken berita si meriah seh ngasa 30 ntah pe 50 jam sebulan.

Perintis tersuruh ukurna perban keleng atena man Dibata ras jelma si deban. Bali bagi Jesus, ipernehen kami maka genduari melala kalak merluken bimbingen rohani. (Markus 6:34) Ras, lit pemeteh kami si banci nampati kalak e gundari janah mereken arapen si pasti kerna wari si pepagi. Kekelengen kempak kalak si deban nge si erbahan sekalak perintis nggit mereken melala waktu ras gegehna guna nampati kalak kerna hal rohani. (Matius 22:39; 1 Tesalonika 2:8) Ulihna, kinitekenna ipegegeh, hubungenna ras Dibata reh deherna, janah ia pe ndatken keriahen ukur.​—Perbahanen Rasul-Rasul 20:35.

• Jelasken kai maksudna perintis.

• Kai nge erbahanca tersuruh ukur piga-piga kalak jadi perintis biasa ntah pe perintis istimewa?