Ewe kapas “pioneer” a wewe ngeni chókkewe ra kan ló ngeni mineféén fénú me poputááni och mettóch pwe epwe suuk ngeni ekkewe ekkóch ar repwe tapweló mwirin. Jesus a usun emén pioneer, a fen feitiw fénúfan pwe epwe féri ewe angangen afalafal mi amanawa aramas me poputá le suuk ngeniir ewe alen amanaw. (Mateus 20:28; Ipru 12:2) Ikenái, ekkewe chón tapweló mwirin Jesus ra áppirú i le ‘ewinano aramas pwe repwe noun chon káé’ ren ar áeá ar fansoun úkúkún ar tufich. (Mateus 28:19, 20, KG) Ekkóch ra tongeni tufichin fiti ei angang aua eita ngeni pioneer.

Emén pioneer a wewe ngeni emén a áeá watteen fansoun le afalafal. Meinisin Chón Pwáraatá Jiowa iir chón afalafala ewe kapas allim. Iwe nge, ekkóch ra akkóta manawer me pwon pwe repwe fiti ewe angang a iteni regular pioneer mi afalafal úkúkún 70 awa iteiten maram. Ra féri ei ren ar akúkkúnaló ar fansoun fán iten angangen moni. Ekkóch ra kefil le fiti ewe angang a iteni special pioneer ikewe ie a fókkun osupwangen chón afalafala ewe Mwú. Iwe iir mi afalafal úkúkún 130 awa are lap seni iteiten maram. Ekkeei pioneer ra menemenéch lón manawer me lúkúlúk pwe Jiowa epwe awora met ra eáni osupwang lón manawer. (Mateus 6:31-33; 1 Timoty 6:6-8) Chókkewe rese tongeni áeá watteen fansoun le afalafal ra tongeni fiti ewe angang a iteni auxiliary pioneer. Iwe iir mi tongeni afalafal 30 are 50 awa lón eú maram.

Emén pioneer a chúng ren án tong ngeni Kot me aramas. Sipwe usun Jesus le kúna osupwangen aramas ikenái lón pekin lúkú. (Markus 6:34) A nóm rech ewe sile pwe sipwe álisiir iei le eáni ewe ápilúkúlúk mi núkúchar fán iten mwachkkan. Án emén pioneer tongei chón órun a amwékútú le fangoló watteen an fansoun me péchékkúl pwe epwe álisi ekkewe ekkóch lón ar riri ngeni Kot. (Mateus 22:39; 1 Tesalonika 2:8) Mwirilóón, án ewe pioneer lúkú a péchékkúleló, a fókkun arap ngeni Kot me a kúna watteen pwapwa.​—Föför 20:35.

• Ifa usun kopwe áweweei ewe kapas pioneer?

• Met a achchúngú ekkóch pwe repwe pioneer, ewe mi áeá watteen fansoun le afalafal?