Lè yo ka di on moun « pyonyé », jénéralman sé pou di kè sé-y prèmyé ki lansé on nouvo aktivité é ki wouvè chimen pou lézòt. Nou pé di Jézi sété on pyonyé, paskè Bondyé voyé-y si latè pou-y té koumansé préché on mésaj ki pé ban-nou lavi é pou-y té wouvè chimen-la ki ka ban-nou posibilité sové vi an nou (Matyé 20:28). Jòdijou, disip a-y ka imité-y lè yo ka pasé onlo tan, lè plis tan posib, ka fè dòt disip (Matyé 28:19, 20). Adan yo, ni sa ki rivé pran sa nou ka kriyé sèwvis pyonyé.

On pyonyé ka pasé on bon pati a tan a-y ka préché. Tout Témwen a Jéova ka préché bon nouvèl-la. Men sèwten adan yo òwganizé vi a yo pou yo sèvi antankè pyonyé pèwmanan, sètadi pou yo préché 70 èdtan toulémwa. Pou yo rivé fè sa, souvan yo ka désidé travay mwens. Ni dòt yo ka voyé antankè pyonyé èspésyal dé koté pa ni asé moun pou préché. Séla ka préché omwen 130 è chak mwa. Sé pyonyé-la ka kontanté-yo dè ni on vi senp pas yo ka fè Jéova konfyans pou ba-yo tousa yo bizwen (Matyé 6:31-33 ; 1 Timoté 6:6-8). Ni sa sitiyasyon a yo pa ka pèwmèt-yo préché otan. A moman-lasa, yo pé désidé pran sèwvis pyonyé an ranfò. Pannan omwen on mwa, yo ké préché 30 oben 50 èdtan.

On pyonyé ka préché pas i enmé Bondyé é pas i enmé pwochen a-y. Menmjan ki Jézi, nou ka konstaté kè onlo moun vréman bizwen konnèt Bondyé (Mawk 6:34). É, konésans-la nou ni la pé édé-yo dépi konnyéla é ba-yo on lèspwa solid. Pas i ni lanmou pou pwochen a-y, on pyonyé ka itilizé tan a-y é énèrji a-y pou édé dòt moun konnèt bon nouvèl-la. É i ka fè sa volontyé (Matyé 22:39 ; 1 Tésalonisyen 2:8). An rètou, fwa a-y ka vin pli solid, sa ka raproché-y dè Bondyé é tchè a-y ka kontan toubòlman (Akt 20:35).

• Kijan ou té ké èspliké ka ki on pyonyé ?

• Ka ki ka ba on Témwen a Jéova lanvi vin pyonyé ?