“ Pələkulɔmun ” gaa a nu yii a mɛni doloo kɛ, ə lɛɛ nu takpɛliɠaa di hwilɛn bulu. Gwa pɛli kɛi ma Zesu ə kɛ a pələkulɔmun, maahɔlɔɓo Yálá ə dɛɛ lɔi mɛi ə gɛ ə Yálá lawoo laa həliɛ kɔwɔtɔɔ, yii a yɛnɛɛ tɛɛ nua pɔ, ə lɛɛ ə gɛ nua nwun maa yɛ pɛli ɓoi (Matie 20:28). Háákələi, Zesu ŋɔ kalan nea da bɔɔ kɔɔn, diɛ lowai kɛnɛ həɠə ɉu, ə gɛ di nu takpɛliɠaa kɛ a Zesu ŋɔ kalan nea (Matie 28:19, 20). Yii kwa kɛ ma pələkulɔmun gɛ kóló, nu taɠaa daa pɛli ma.

Pələkulɔmun gaa a nu yii a lowai kɛnɛ həɠə ɉu yɛ Yálá lawoo laa həli. Zehova ŋɔ Kəlaɠaa kəlee da Yálá lawoo laa həli. Kɛlɛɛ, daɠaa daa gɛ pələ kwɛlima diɛ lɛɛlɛ 70 kɛ ŋalən ma diɛ Yálá lawoo laa həli. Da di kpɔɔ kóló ta kulɔ ma yili maa mɛni ɓa. Da daɠaa həɠə ɉu, di di tɛɛ ɓɛi Yálá lawoo laa həli mɛni ŋɔ kpaan gaa laa. Lɛɛlɛ 130 ɓə da gɛ ŋalən ma, diɛ Yálá lawoo laa həli. Pələkulɔnua di hwa hɛn gɔu maa liihɛlɛn ɉee, da di kili tɔɔ Zehova ɓa di maakpaan gbɛɛ mɛni ɓa (Matie 6:31-33 ; Timɔtə dɔlɔɔ 6:6-8). Zehova ŋɔ Kəlaɠaa yiiɠaa di hwa pɛli lowai kɛnɛ hɔlɔɓoi, da pɛli di lɛɛlɛ 30 kɛ awala kɛtii lɛɛlɛ 50 * ŋalən dɔnɔ yee mu, diɛ Yálá lawoo laa həli.

Pələkulɔmun gaa a nu yii a Yálá da nua di wɛlilakɛ. Gbaɠala ə kɛ Zesu ɓa yɛ nu tamaa maakpaan gaa Yálá kɔlɔnŋaa ɓa, kuɔ kpɛli kwaa yili ɲaakaa háákələi (Malikə 6:34). Yaan, yii kwaa maakwɛli Biblə hu a pɛli kpɔnmaa tɛɛi di pɔ yiihu, ə lɛɛ ə kilitɔɔmaa laa leelee tɛɛ di pɔ yɛ hwilɛn na yɛnɛɛ dɔwɔ pələ ɓa. Pələkulɔmun a nua wɛlilakɛ, yili ɓə a gɛ yɛ lowai kɛnɛ həɠə, da vaŋa, yɛ kpɔnmaa tɛɛ la nua pɔ wɛlɛɛ lɛlɛɛ kɔlɔn mɛni ɓa (Matie 22:39 ; Tesalonikə dɔlɔɔ 2:8). Yaa kpɛli, ŋɔ laana laa hu a wala-wala, ə maalɛɠɛ Yálá ɓa, ə lɛɛ ə kwəinɛɛ kɛnɛ hɔlɔɓo. — Túwɔ́ pələ 20:35.

• Gbɛɛ ɓə da kɛ ma pələkulɔmun ?

• Lə ɓə a gɛ nu taɠaa diɛ kɛ a pələkulɔnua ?