‘U sanuluodo’ tie yua n yen ga liiga ki ŋanbi u sanu nitoaba po. Jesu wani oba den tie sanuluodo kelima o cili mi yemŋama labaali kpaanma tuonli. O luodi u sanu bi nisaaliba faabima po. (Matie 20:⁠28) Dinli-​dinla o ŋoadikaaba li ŋua yeni. Bi taandi bi lenli kuli ki lingi Jesu ŋoadikaaba toaba. (Matie 28:⁠19, 20) Bi siiga nni nitianba yen kuani bi yula cain laa tuonli nni, ke bi yii ba bi sanuluodiba.

U sanuluodo tie yua n kuani o yuli cain u laabaaliŋamo kpaanma nni. Jeova Siedinba kuli kpaandi u laabaaliŋamo yeni. Ama bi siiga nni bi tianba tuuni yaa tuonli n ki taandi bi lenli kuli, ke ŋmaalo kuli bi kpaandi kudu 70. Bi yii-ba ke u yogunu kuli sanuluodiba. Bi tianba mo tie yaa sanuluodiba yaaba ki pia lie. Bi yen soani-​ba yaa dogi n kaa pia kpaanikaaba boncianla nni. Ŋmaalo kuli bi kpaandi kudu 130 bi ki cie lani. Laa sanuluodiba naa lingi bonli boncianla bi yema nni, kelima bi bani ke Jeova baa paa-​ba yaala n tie tiladi. (Matie 6:⁠31-​33; Timote Tikpiali 6:​6-​8) Yaaba n kan fidi kuani bi yula cain laa tuonli nni, yen ñani bi yama ki kpaandi kudu 30 bi kudu 50 ŋmaalo kuli. Bi yii-ba bi sanuluodiba todikaaba.

U sanuluodo tie yua n bua Jeova leni o lieba. Nani Jesu ti nua ke bi niba boncianla bua mi todima U Tienu maama bangima po. (Marki 6:⁠34) Ama ti bani yaala baa fidi todi-​ba bi yema dinli-​dinla, ki go paa-​ba mi suginma saala po. Bi sanuluodiba buama bi niba po n cedi ke bi kuani bi yula, bi lenli, bi paalu cain laa tuonli nni. Bi todi-​ba ke bi bandi U Tienu. (Matie 22:⁠39; Tesaloniki Yaaba Tikpiali 2:⁠8) Laa tuonli puuni-​ba li dandanli papaali, li pugindi bani leni U Tienu danligu paalu, li go puuni-​ba li pamancianli.​—⁠Jesu Tondiba Tuona 20:⁠35.

• U sanuluodo tie ŋme?

• Bee n cedi ke u sanuluodo kuandi o yuli cain o tuonli nni?