Tas wort “pioneer” petayt normalmënt yemant woo foer keet un te weech fer anere layt uf macht. Mëyer khëne saan tas Yeesus een pioneer waar, wayl ëyer uf ti ëyert kexikt këpt is fer een nooricht, woo leepes rët, se preetiche un soo hot ëyer te weech fer ti rëtung uf kemacht. (Mateus 20:28) Hayt tuun mëyer sayn payxpiil noo mache, too torich, tas mëyer uns soo fiil tsayt hoole wii mëyer khëne, fer ‘tisiple se mache’. (Mateus 28:19, 20) Ëtliche tuun in te aarwayt mit mache woo pioneer aarwayt kenënt këpt.

Een pioneer is een fol tsayt preeticher. Ale woo Yeehoowa sayn Tsayer sin, tuun ti kuute aatere preetiche. Awer, ëtliche hon sayn leepe orkanisiirt fer pioneere se sin un tuun 70 xtuune im moonat preetiche. Fer tas, tuun fiile een halpe taachs aarwayt suuche. Anere sin raus kesuucht fer wii spetsiaal pioneere se tiine un wëre tat hin kexikt woo mee preeticher fon raych neetich sin. Tii tuun 130 xtuune orer mee im moonat preetiche. Ti pioneere sin tsufriite mit een keweenlich leepe un ferlose sich truf tas Yeehoowa tëne ales këpe tuut was se prauche. (Mateus 6:31-33; 1 Timóteo 6:6-8) Tii woo es nët hin kriin pioneere se sin, khëne imer wëns meechlich is, wii hilef pioneere tiine un 30 orer 50 xtuune im moonat preetiche.

Een pioneer wërt fon liipe tsu Kot un tsu mënxe motiwiirt. Soo wii Yeesus, siin mëyer hayt aach tas fiil layt unkliiklich sin un khee hofnung hon. (Marcos 6:34) Awer, mëyer hon informatsioone woo hayt xon tëne hëlfe khëne un woo een sicher hofnung këpt. Wayl te pioneer ti anere liipt, penutst ëyer sayn tsayt un kraft fer anere hëlfe ti kuute aatere se lërne. (Mateus 22:39; 1 Tessalonicenses 2:8) Tas tuut sayn aychne klaape xtërke, tuut tee tichter pay Kot hale un pringt frooheet. — Atos 20:35.

• Wii teest tuu een pioneer pexraype?

• Was tuut yemant motiwiire fer een pioneer se sin?