Ndeto “vainia” kaingĩ yonanasya mũndũ ũla wambĩĩaa wĩa mũna isionĩ nzaũ na kwa kwĩka ũu aivingũĩa angĩ nzĩa. Yesũ aĩ ta vainia nũndũ nĩwatũmiwe kũũ nthĩ atethye wĩa ũtonya kũtuma andũ makwata thayũ na aimavingũĩa nzĩa ya kũkwata wovosyo. (Mathayo 20:28) Ũmũnthĩ, aatĩĩi make maatĩaa ngelekany’o yake kwa kũtũmĩa ĩvinda yingĩ ũndũ vatonyeka ‘kũtw’ĩkĩthya mbaĩ amanyĩw’a.’ (Mathayo 28:19, 20) Amwe moo nĩmatw’ĩkĩte mavainia.

Vainia nĩ mũtavany’a wa ĩvinda yonthe. Ngũsĩ sya Yeova syonthe nĩ atavany’a ma ũvoo mũseo. Ĩndĩ, amwe nĩmavangĩte maũndũ moo nĩ kana methĩwe mavainia ma kĩla ĩvinda, na kĩla mwei matavanasya masaa 70. Nĩ kana meke ũu, aingĩ mathũkũmaa masaa manini wĩanĩ wa kĩmwĩĩ. Ve angĩ manyuvawa methĩwe mavainia ma mwanya kũndũ kũla kwĩ vata mũnene wa atavany’a ma Ũsumbĩ, na kĩla mwei matavanasya masaa 130 kana maingangĩ. Mavainia nĩmeanĩawa kwĩkala mate na syĩndũ mbingĩ, me na mũĩkĩĩo kana Yeova akeanĩsya mavata moo. (Mathayo 6:31-33; 1 Timotheo 6:6-8) Ala matatonya kwosa ũvainia wa ĩvinda yonthe no methĩwe mavainia ma mavinda ĩla matonya, na kwa kwĩka ũu mayongela ũthũkũmi woo kwa kũtavany’a masaa 30 kana 50 kwa mwei.

Mũndũ atw’ĩkaa vainia nũndũ wa kũmwenda Ngai na kũmenda andũ. O ta Yesũ, ũmũnthĩ nĩtwonaa kana andũ aingĩ me na vata mũnene wa kũmũmanya Ngai na ieleelo syake. (Maliko 6:34) Ĩndĩ, twĩ na ũmanyi ũla ũtonya kũmatethya ũmũnthĩ na kũmanenga wĩkwatyo mũlũmu wa ĩvinda yũkĩte. Kũmwenda mũtũi nĩkũtumaa vainia atũmĩa ĩvinda yake na vinya wake kwa ũlau kũtetheesya angĩ kĩveva. (Mathayo 22:39; 1 Athesalonika 2:8) Kwa nzĩa ĩsu, mũĩkĩĩo wake nũlũlũmĩĩlaw’a, akamũthengeea Ngai, na ayĩthĩwa na ũtanu mwingĩ.​—Meko ma Atũmwa 20:35.

• Ũtonya kwasya vainia nũũ?

• Nĩ kyaũ kĩtumaa andũ amwe mosa ũvainia wa ĩvinda yonthe?