Oshitya “omukokolindjila” ohashi longifwa luhapu okuulika kovanhu ovo ve litota koitukulwa ipe ndele tava palele vamwe ondjila ve uye yo koitukulwa oyo. Jesus okwa li omukokolindjila meityo olo kutya okwa li a tumwa kombada yedu opo a wanife po oilonga yokuudifa oyo tai xupifa eemwenyo nokupala ondjila opo ovanhu va dule okuxupifwa. (Mateus 20:28) Kunena, ovashikuli vaye ohava shikula oshihopaenenwa shaye mokulongifa efimbo lihapu ngaashi tashi dulika moilonga ‘yokuninga ovanhu ovalongwa.’ (Mateus 28:19, 20) Vamwe vomuvo otava longo oilonga oyo kunena hatu ti oukokolindjila.

Ovakokolindjila ove li ovalongi vefimbo li yadi. Eendombwedi daJehova adishe odi li ovaudifi vonghundana iwa. Ndele dimwe domudo ohadi unganeke okukalamwenyo kwado opo di longe di li ovakokolindjila vondjikilile, ovo hava longo oupokati weevili 70 omwedi keshe moilonga yokuudifa. Opo ovakokolindjila ovo va dule okuwanifa po eevili odo, vahapu vomuvo ohava longo etatafiku koilonga yavo yokulikongela omboloto. Vamwe ohava nangekwa po ve li ovakokolindjila ve likalekelwa nelalakano va ka longe koitukulwa oko ku na omhumbwe yovaudifi vOuhamba, nohava longo eevili 130 omwedi keshe ile di dulife po. Ovakokolindjila ohava kala nonghalamwenyo i li paunafangwa, nohava kala ve na elineekelo kutya Jehova ote ke va fila oshisho shi na sha noipumbiwa yonghalamwenyo. (Mateus 6:31-33; 1 Timoteus 6:6-8) Eendombwedi dimwe odo itadi dulu okuya moukokolindjila wefimbo li yadi ohadi longo omafimbo amwe di li ovakwafelikokolindjila ngeenge eenghalo tadi shi pitike, nopeemhito da tya ngaho, ohadi ningi eenghendabala da wedwa po opo di longe eevili 30 ile 50 moilonga yokuudifa momwedi.

Ovakokolindjila ohave linyengifwa kohole yokuhola Kalunga nosho yo ovanhu vakwao. Ngaashi Jesus, nafye ohatu kala tu wete eenghalo dinyikifa oluhodi omo ovanhu vahapu kunena ve li nonokutya ova pumbwa okuuda kombinga yaKalunga nosho yo omalalakano aye. (Markus 6:34) Otu na eshiivo olo tali dulu oku va kwafela paife mokukalamwenyo kwavo nova kale ve na eteelelo la twa li na sha nonakwiiwa. Ohole yokuhola vamwe ohai linyengifa ovakokolindjila va longife nehalo liwa efimbo neenghono davo opo va udifile ovanhu onghundana iwa. (Mateus 22:39; 1 Ovatessaloniki 2:8) Oshidjemo, eitavelo lovakokolindjila ohali pamekwa, ohava ehene popepi elela naKalunga nohava kala va hafa neenghono. — Oilonga 20:35.

• Omukokolindjila oshike?

• Oshike hashi linyengifa vamwe va ninge ovakokolindjila vondjikilile?