ٸزاشار دەپ بەلگىلى ٴ‌بىر ٸستى العاشقى بولىپ قولعا الىپ،‏ ونىڭ ٵرى قاراي دامۋىنا جول اشاتىن ادامدى ايتادى.‏ يسانى ٸزاشار دەۋگە بولادى،‏ ويتكەنى ول ٶمىر سيلايتىن ۋاعىز ٸسىن باستاپ،‏ ادامداردىڭ قۇتقارىلۋىنا جول اشتى (‏ماتاي 20:‏28‏)‏.‏ بۇگىندە ونىڭ جولىن قۋعان ٸزباسارلارى «شاكىرت دايىنداۋ» ىسىنە مۇمكىندىگىنشە كوپ ۋاقىت جۇمساۋعا تىرىسادى (‏ماتاي 28:‏19،‏ 20‏)‏.‏ ولاردىڭ كەيبىرى ٸزاشارلىق قىزمەت دەپ اتالاتىن قىزمەت ٴ‌تۇرىن اتقارادى.‏

ٸزاشار تولىق ۋاقىتتى قىزمەتشى بولىپ سانالادى.‏ ەحوبا كۋاگەرلەرىنىڭ بارلىعى دا ىزگى حاباردى جاريالاۋعا اتسالىسادى.‏ الايدا كەيبىرەۋلەرى ۋاعىز ىسىنە ايىنا 70 ساعات ارنايتىن تۇراقتى ٸزاشارلار رەتىندە قىزمەت ەتۋدى شەشىپ،‏ كۇندەلىكتى تىرلىكتەرىن وسى قىزمەت ٴ‌تۇرىن اتقارا الاتىنداي ەتىپ جوسپارلايدى.‏ مىسالى،‏ كوبىسى بۇل ٷشىن بۇرىنعىدان از ۋاقىت جۇمىس ىستەۋدى ٴ‌جون كورەدى.‏ وزگەلەرى جاريالاۋشىلار جەتىسپەيتىن جەرلەردە ارنايى ٸزاشارلار رەتىندە قىزمەت ەتۋگە تاعايىندالادى.‏ ولار ۋاعىز ىسىنە ايىنا 130 ساعات ارنايدى.‏ بۇل ٸزاشارلار ەحوبانىڭ وزدەرىن ەڭ قاجەتتى نارسەمەن قامتاماسىز ەتەتىنىنە سەنىمدى بولىپ،‏ بارعا قاناعات ەتەدى (‏ماتاي 6:‏31—‏33؛‏ تىموتەگە 1-‏حات 6:‏6—‏8‏)‏.‏ ال تولىق ۋاقىت قىزمەت ەتە المايتىندار مۇمكىندىكتەرى بولعان كەزدەرى ايىنا 30 نە 50 ساعات جۇمسايتىن قوسالقى ٸزاشارلار رەتىندە قىزمەت ەتە الادى.‏

ٸزاشار بولۋعا قۇدايعا جانە ادامدارعا دەگەن سۇيىسپەنشىلىك تالپىندىرادى.‏ يسا سياقتى،‏ ٴ‌بىز دە ادامداردىڭ قۇداي جايلى بىلىمگە مۇقتاج ەكەنىن تۇسىنەمىز (‏مارقا 6:‏34‏)‏.‏ ٴ‌بىز ولارعا ٴ‌دال قازىر كومەكتەسە الاتىن ٵرى بولاشاققا دەگەن بەرىك ٷمىت بەرەتىن بىلىممەن بولىسە الامىز.‏ ٸزاشارلار وزگەلەردى جاقسى كورگەندىكتەن ولارعا ىزگى حاباردى جاريالاۋ ٷشىن ۋاقىتتارى مەن كۇشتەرىن جومارتتىقپەن جۇمسايدى (‏ماتاي 22:‏39؛‏ سالونيكالىقتارعا 1-‏حات 2:‏8‏)‏.‏ وسىلاي ەتكەننىڭ ارقاسىندا ٸزاشارلاردىڭ سەنىمى نىعايادى.‏ سونداي-‏اق ولار قۇدايعا جاقىنداي تۇسەدى ٵرى وزگەلەرگە بەرۋدەن كەلەتىن قۋانىشقا كەنەلەدى (‏ەلشىلەردىڭ ىستەرى 20:‏35‏)‏.‏

• ٸزاشارلار دەگەن كىمدەر؟‏

• كەيبىرەۋلەردى ٸزاشار بولىپ قىزمەت ەتۋگە نە تالپىندىرادى؟‏