“Mpasudi-nzila” kevuandaka mbala mingi muntu ya ntete yina mekuenda kisika mosi mpe yandi mezibula nzila samu bayankaka balanda. Yesu vuandaka lokola mpasudi-nzila, samu Nzambi tindaka yandi awa na ntoto samu yandi samuna nsangu yina kepesaka luzingu, mpe yandi pesaka bantu diluaku ya kuvuka. (Matayo 20:28) Bubu yayi, banlonguki na yandi kelandaka kifuani na yandi na mutindu bau kesalaka mingi mpenza na kisalu ya ‘kukumisa bantu balongoki.’ (Matayo 28:19, 20) Bantu yankaka kevuandaka na diluaku ya kusala yina beto kebokidilaka kisalu ya mpasudi-nzila.

Mpasudi-nzila kele nsamuni ya ntangu nionso. Bambangi ya Yehova nionso kele bansamuni ya nsangu ya mbote. Kasi, bayankaka kebongisaka mambu ya luzingu ya bau samu bau vuanda bampasudi-nzila ya ngonda na ngonda. Bau kesamunaka bawola 70 ngonda na ngonda. Samu na kusala yau, mingi keponaka kisalu yina kebakaka bau ntangu mingi ve. Bayankaka keponamaka samu bavuanda bampasudi-nzila ya nene na bisika yina bansamuni ya Kimfumu kele mingi ve. Bau kesamunaka bawola 130 ngonda na ngonda. Bampasudi-nzila kesepelaka kuvuanda na luzingu ya kusosa mambu mingimingi ve. Bau ketulaka kivuvu na Yehova ti yandi kepesa bau bima yina bau mefuana na yau. (Matayo 6:31-33; 1 Timoteo 6:6-8) Bayina lenda sala kisalu ya mpasudi-nzila ya ngonda na ngonda ve balenda pona kuvuanda bampasudi-nzila ya ntangu ya nkufi, kana diluaku memonana, mpe bakesamuna bawola 30 to 50 na ngonda mosi.

Mpasudi-nzila kesamunaka mingi samu yandi kezolaka Nzambi na bantu. Mutindu mosi na Yesu, beto kemonaka mutindu bantu mingi mekondua nguizani ya mbote na Nzambi. (Marko 6:34) Kansi beto kele na nzayilu yina lenda sadisa bau banda bubu yayi, mpe kupesa bau kivuvu samu na bilumbu kena kuiza. Mpasudi-nzila kezolaka bantu, mpe yau nde ketindaka yandi yandi sadila ntangu mpe ngolo na yandi samu na kusadisa bau bazaba nsangu ya mbote. (Matayo 22:39; 1 Batesalonika 2:8) Na yau, kiminu na yandi kekumaka ngolo; yandi kepusanaka diaka penepene na Nzambi mpe yandi kekumaka na kiese mingi.​—Bisalu 20:35.

• Nani yina mpasudi-nzila?

• Yinki ketindaka muntu kuma mpasudi-nzila ya ntangu nionso?