E mvovo “mviti a nzila,” nkumbu miayingi usadilwanga mu yika awana bekuyivananga e mvimba mu kwenda sadila mu zunga yampa yo ziula nzila kimana akaka batanginina e mbandu au. Yesu wakala nze mviti a nzila, watumwa ova ntoto mu samuna nsangu zambote zivan’o moyo yo ziula e nzila kwa wantu mu vuluka. (Matai 20:28) O unu, alandi andi betangininanga e mbandu andi muna wokesa e salu kiau kia kitula wantu “s’alongoki.” (Matai 28:19, 20) Akaka bekotanga mu salu kiyikilwanga vo salu kia kimviti a nzila.

O mviti a nzila i muntu osamunanga nsangu zambote ntangwa ke ntangwa. Mbangi za Yave yau awonso ateleki a nsangu zambote. Kansi akaka bevevolanga e zingu kiau mu kota mu salu kia mviti a nzila a ngonde ke ngonde mu salanga 70 lwa ola mu konso ngonde muna salu kia umbangi. Muna lenda wo vanga, ndonga besalanga kaka ndambu ya lumbu kuna kompani kimana bakala ye ntangwa yafwana. Akaka besalanga salu kia mviti a nzila a espesiale muna zunga ivwilu ateleki ayingi a Kintinu o mfunu. Besalanga 130 ma ola yovo vioka muna konso ngonde mu salu kia umbangi. Aviti a nzila bevevolanga e zingu kiau yo bunda e vuvu kwa Yave vo olungisa e nsatu zau zawonso. (Matai 6:31-33; 1 Timoteo 6:6-8) Awana ke belendanga sala salu kia kimviti a nzila a ngonde ke ngonde ko, balenda kwau sala se aviti a nzila ansadisi muna salanga ola 30 yovo 50 muna konso ngonde.

O zola muna Nzambi yo wantu kufilanga mviti a nzila mu sala e salu kiaki. Nze Yesu, tubakulanga vo wantu ayingi nsangu zambote bavwidi o mfunu o unu. (Maku 6:34) Oyeto tuvwidi o zayi ulenda kubasadisa kana nkutu owau yo kubavana e vuvu kiasikila kia kusentu. O zola muna mfinangani kufilanga o mviti a nzila mu sadila ntangwa ye ngolo zandi mu sadisa akaka bawá e nsangu zambote. (Matai 22:39; 1 Tesalonika 2:8) Muna kuma kiaki, o lukwikilu lwa mviti a nzila lukumamanga, ofinamanga Nzambi yo kala ye kiese kiayingi.—Mavangu 20:35.

• Kuna kwa ngeye nani i mviti a nzila?

• Nki kifilanga akaka mu kota mu salu kia kimviti a nzila a ngonde ke ngonde?