ບົດທີ 13
ໄພໂອເນຍແມ່ນຫຍັງ?
ຄຳວ່າ “ໄພໂອເນຍ” ສ່ວນຫຼາຍໝາຍເຖິງຜູ້ທີ່ບຸກເບີກເຂດໃໝ່ແລະເປີດທາງໄວ້ໃຫ້ຜູ້ອື່ນຕິດຕາມ. ພະເຍຊູເປັນຄ້າຍຄືກັບໄພໂອເນຍ ຖືກສົ່ງມາແຜ່ນດິນໂລກເພື່ອເຮັດໜ້າທີ່ສະລະຊີວິດຂອງຕົນເອງແລະເປີດໂອກາດໃຫ້ມະນຸດຮັບຄວາມລອດ. (ມັດທາຍ 20:28) ໃນທຸກມື້ນີ້ ພວກລູກສິດຂອງພະເຍຊູກຳລັງຮຽນແບບພະອົງໂດຍໃຊ້ເວລາຫຼາຍເທົ່າທີ່ຈະເປັນໄປໄດ້ໃນການ “ກະທຳ . . . (ໃຫ້) ເປັນລູກສິດ.” (ມັດທາຍ 28:19, 20) ບາງຄົນສາມາດມີສ່ວນຮ່ວມໃນວຽກທີ່ເອີ້ນວ່າການຮັບໃຊ້ເປັນໄພໂອເນຍ.
ໄພໂອເນຍແມ່ນຜູ້ປະກາດເຕັມເວລາ. ພະຍານພະເຢໂຫວາໝົດທຸກຄົນເປັນຜູ້ປະກາດຂ່າວດີ. ແຕ່ບາງຄົນໄດ້ຈັດຮູບແບບຊີວິດຂອງຕົນເພື່ອສາມາດຮັບໃຊ້ເປັນໄພໂອເນຍປະຈຳ ເຊິ່ງໃຊ້ເວລາ 70 ຊົ່ວໂມງໃນແຕ່ລະເດືອນເພື່ອການປະກາດ. ເພື່ອເຮັດແບບນີ້ໄດ້ ຫຼາຍຄົນເຮັດວຽກຫາລ້ຽງຊີບແບບບໍ່ເຕັມເວລາ. ສ່ວນຄົນອື່ນ ໆ ເລືອກທີ່ຈະຮັບໃຊ້ເປັນໄພໂອເນຍພິເສດ ໃນເຂດທີ່ມີຄວາມຕ້ອງການຜູ້ປະກາດເລື່ອງລາຊະອານາຈັກຫຼາຍກວ່າ ໂດຍໃຊ້ເວລາ 130 ຊົ່ວໂມງຫຼືຫຼາຍກວ່ານັ້ນໃນການປະກາດແຕ່ລະເດືອນ. ໄພໂອເນຍພໍໃຈກັບການໃຊ້ຊີວິດແບບຮຽບງ່າຍໂດຍໝັ້ນໃຈວ່າພະເຢໂຫວາຈະສະໜອງສິ່ງທີ່ຈຳເປັນໃນຊີວິດຂອງເຂົາເຈົ້າ. (ມັດທາຍ 6:31-33; 1 ຕີໂມເຕ 6:6-8) ສ່ວນຜູ້ທີ່ບໍ່ສາມາດເປັນໄພໂອເນຍເຕັມເວລາໄດ້ ກໍອາດຮັບໃຊ້ເປັນໄພໂອເນຍສົມທົບ ເມື່ອສາມາດເຮັດໄດ້ ໂດຍເພີ່ມເວລາປະກາດໃຫ້ໄດ້ 30 ຫຼື 50 ຊົ່ວໂມງຕໍ່ເດືອນ.
ໄພໂອເນຍຖືກກະຕຸ້ນດ້ວຍຄວາມຮັກທີ່ມີຕໍ່ພະເຈົ້າແລະຕໍ່ຄົນອື່ນ. ເຊັ່ນດຽວກັບພະເຍຊູ ໃນທຸກມື້ນີ້ພວກເຮົາສັງເກດເຫັນວ່າຫຼາຍຄົນຕ້ອງການຢາກຮູ້ກ່ຽວກັບພະເຈົ້າແລະຈຸດປະສົງຂອງພະອົງ. (ມາລະໂກ 6:34) ພວກເຮົາມີຄວາມຮູ້ທີ່ສາມາດຊ່ວຍເຂົາເຈົ້າໄດ້ໃນເວລານີ້ ເຊິ່ງເປັນການໃຫ້ຄວາມຫວັງອັນແໜ້ນແກ່ນສຳລັບອະນາຄົດ. ຄວາມຮັກທີ່ມີຕໍ່ເພື່ອນບ້ານກະຕຸ້ນໄພໂອເນຍໃຫ້ໃຊ້ເວລາແລະກຳລັງວັງຊາຂອງຕົນຢ່າງໃຈກວ້າງໃນການຊ່ວຍຄົນອື່ນ ໆ ໃຫ້ຮູ້ຈັກຂ່າວດີ. (ມັດທາຍ 22:39; 1 ເທຊະໂລນີກ 2:8) ຜົນກໍຄື ໄພໂອເນຍມີຄວາມເຊື່ອທີ່ເຂັ້ມແຂງຂຶ້ນ ເຂົ້າໃກ້ຊິດພະເຈົ້າຫຼາຍຂຶ້ນ ແລະປະສົບກັບຄວາມຍິນດີຢ່າງຫຼວງຫຼາຍ.—ກິດຈະການ 20:35
-
ທ່ານຈະພັນລະນາໄພໂອເນຍວ່າແນວໃດ?
-
ສິ່ງໃດທີ່ກະຕຸ້ນບາງຄົນໃຫ້ເປັນໄພໂອເນຍເຕັມເວລາ?