Na precursor chjenjui dʼa ntee kʼꞹ paa axojñi, xokʼꞹ na ñʼii ngekʼua yo ntee kʼo ba e̱je̱ axꞹtrjꞹ ra søø ra kjogꞹji. Kʼo paa ma e Jesús mi bʼꞹbʼꞹ kja ne Xoñijomꞹ, nge kʼꞹ otrʼꞹ go maa kja o ngumꞹ kʼo ntee mi jichi o jñaa e Mizhokjimi, xo gua ne̱ nrru̱u̱ ngekʼua ba ngontrʼꞹ in pekado ngekʼua dya kja ra tu̱ji (Mateo 20:28). Yo padya yo ri testigojme e Jehová ri kjagojme ja gua tsjaa e Jesús, ri pojme kja o ngumꞹji yo ntee ri jichijme kʼo mama ne Biblia (Mateo 28:19, 20). Bʼꞹbʼꞹ kjuarma kʼo ga tsjaji precursor, mbøsʼꞹji yo ntee ra mba̱ra̱ji Mizhokjimi.

Yo precursor pama pama jichiji yo ntee pje mama ne Biblia. Nrrexe yo ri testigojme e Jehová ri jichkʼojme yo ntee pje mama ne Biblia. Pe bʼꞹbʼꞹ kjuarma kʼo ngeji precursor regular, nzi na zana kjaji setenta ora. Ngekʼua dya pɇsʼiji na bʼɇpji kʼꞹ ra pɇpjiji nrrexe yo paa, pɇpjiji janzi ora, bʼꞹnkʼo pɇpjiji ma xo̱rtjo, bʼꞹnkʼo pɇpjiji ma nrrempa. Bʼꞹnkʼo ngeji precursor especial, nzi na zana ixi kjogꞹ ciento treinta ora kʼꞹ jichiji yo ntee. Angezeji poji kja ñaja congregación, pa pjøsʼꞹji yo kjuarma ngekʼua ra jichiji yo ntee kʼo ka̱ra̱jinu. Yo precursor dya jodʼꞹji ra jꞹ̱ji na punkjꞹ merio, pa̱ra̱ji ke e Jehová ra mbøsʼꞹji ngekʼua ra mbɇsʼiji pje ra ziji, ra mbɇsʼiji pje ra jyeji, ra mbɇsʼiji ja ra oxꞹji nu ja ka̱ra̱ji (Mateo 6:31-33; 1 Timoteo 6:6-8). Kʼo kjuarma kʼꞹ dya søø ra tsjaji precursor regular o precursor especial, ga tsjaji precursor auxiliar, nzi na zana kjaji treinta o cincuenta ora.

Yo precursor sʼiyaji Mizhokjimi xo sʼiyaji yo ntee ngekʼua jichiji kʼo mama ne Biblia. Nzakja kʼo paa ma o mimi e Jesús kja ne Xoñijomꞹ, yo padya ri unkʼojme nguenrra dya bʼꞹbʼꞹ kjo ra mbøsʼꞹ yo ntee ngekʼua ra mba̱ra̱ji kʼo mama e Jehová (Marcos 6:34). Pe nuzgojme ri pa̱rgojme pje ra tsjaa e Mizhokjimi a ma axojñi, nge yo ri jichijme yo nteeyo. Yo precursor sʼiyaji yo ntee, nee ra mbøsʼꞹji ra mba̱ra̱ji kʼo mama ne Biblia ngekʼua pama pama jichiji yo ntee (Mateo 22:39; 1 Tesalonicenses 2:8). Yo precursor me mⱥji, unꞹji nguenrra ke e Jehová me sʼiyatrjoji ngekʼua angezeji me xo ga sʼiyaji e Jehová, pa̱ra̱ji ke e Jehová pama pama ra mbøsʼꞹji ra bʼꞹnji na joo, dya pje ra bʼɇtsʼpʼiji (Hechos 20:35).

• ¿Pje kjaa na precursor?

• ¿Pjekja bʼꞹbʼꞹ kjuarma ñe kju̱ʼu̱ kʼo ga tsjaji precursor?