Иктаж-могай шымлыдыме областьыште тӱҥалтыш ошкылым ыштыше айдемым пионер маныт. Ты шотышто Иисусат пионер лийын. Вет тудо, еҥ-влаклан служитлаш да утаралташ йӧным ышташ манын, мландыш толын (Матфейын 20:28). Иегован Таныкше-влак калыкым туныктымаште шуко жапым эртарат. Туге нуно Иисусын примерже почеш ыштат (Матфейын 28:19, 20). Южышт пионер семын служитлат.

Моло деч утларак служитлыше уверзе. Чыла Иегован Таныкше-влак поро уверым шаркалат. Но южышт илышыште тыгай вашталтышым ыштеныт, кудыжо тылзыште 70 шагатым служитлаш йӧным пуа. Тыгай уверзе-влакым эрелык пионер маныт. Пионер семын служитлаш манын, шукышт пашам кечыгут огыт ыште. Нуно тыгай пашам муыт, кушто икмыняр шагатым гына ыштыман. Южыштым специальный пионер семын служитлаш ойырен налыт. Нуным тыгай территорийыш колтат, кушто шукырак уверзе кӱлыт. Кажне тылзын тыгай служитлыше 130 але утларак шагатым таныкла. Пионер проста илышым вӱда. Тудо пеҥгыдын ӱшана: Иегова тудым огеш кодо да илыш кӱлешлыкым ситараш полша (Матфейын 6:31—33; 1 Тимофейлан 6:6—8). А нуно, кӧмыт тунар жапым таныклен огыт керт, тылзыште 30 але 50 шагатым таныклен, полышкалыше пионер семын служитлен кертыт.

Утларак служитлаш Юмым да калыкым йӧратымаш тарата. Иисус семынак, ме ужына: таче шуко еҥын Юмым да тудын шонен пыштымыжым палымыже шуэш (Маркын 6:34). Нунылан тыгай шинчымашым ме пуэн кертына. Тиде шинчымаш ончыкылыклан пеҥгыде ӱшаным пуа. Пионер-влак калыклан поро уверым пален налаш полшат. Лишыл-влакым йӧратымаш нуным шке жапыштым да вийыштым чаманыде пуаш тарата (Матфейын 22:39; 1 Фессалоникысе-влаклан 2:8). Тиде пашам ыштен, пионер шке ӱшанжым пеҥгыдымда, Иегова дене келшымашым вияҥда да кугу куаным налеш (Апост. пашашт 20:35).

• Кӧ тыгай пионер умылтарыза.

• Южыштым утларак служитлаш мо тарата?