Izwi lya kuti “painiya” likalozya ku muntu wino akapanjila wanji inzila pakuti wapitemo. E Yesu tungati walinji we painiya, amuno watumilwe ukufuma kwi yulu ukwiza munsi mukuwomba umulimo wuno wulilenga awavule ukuwa nu wumi wa muyayaya. (Mateyu 20:28) Na pa mpindi yonye awasambilizi wakwe wakamukolanya ukupitila mukuwombesya sana mu mulimo wa ‘kupanga awasambilizi.’ (Mateyu 28:19, 20) Wamwi wano wakawomba wo-o umulimo tukawita ukuti wapainiya.

E painiya we kawizya wa mpindi zyonsi. Inte zya kwe Yehova wonsinye awakawizya wi landwe lizima. Lelo wamwi wasolapo ukupepusya imikalile yawo pa kuti wawombeko wupainiya wa mpindi zyonsi, uwa kuwizya amaawala 70 cila mwezi. Pa kuti wakumanisye amaawala 70, wasiwomba incito ya kuwasendela sana impindi. Wanji nawo wakasontwa ukuwa wapainiya awayiwele wano wakawizya amaawala 130 nu kucilapo cila mwezi. Wa-a wapainiya, wakawatuma ukuya mukuwizya mu ncende muno wakawizya wa Wufumu wacepa sana. Wapainiya wakakwikala imikalile imipepuke, amuno wakamanya ukuti e Yehova alitwalilila ukuwasakamala mwe vyonsinye vino wakulonda. (Mateyu 6:31-33; 1 Timoti 6:6-8) Wano watanga wakumanisye ukuwomba wupainiya wa mpindi zyonsi, wangawombako wupainiya wa kwavwilizya ku kulundulula umulimo wawo. Wangalundako imiwombele yawo ukufika pa maawala 30 nanti 50 cila mwezi.

Ukukunda Leza na wantu akuno kukalenga umuntu ukuwombako wupainiya. Wulyanye vino calinji mu mpindi ya kwe Yesu, na sweswenye tukalola ukuti awantu wakalonda ukumanya Leza na vino vilicitika ku nkolelo. (Marko 6:34) Lelo ndi twawanenako vino twasambilila mu Baibolo, vingawavwa ukwikala icete yo-o impindi nu kuwa ni suwilo ilizima ku mpindi ya kunkolelo. Ukukunda awantu akuno kukalenga wapainiya wawomvya amaka ni mpindi yawo kukwavwa wanji ukusambilila pe Leza. (Mateyu 22:39; 1 Watesalonika 2:8) Ukuwomba wo-o kukalenga wapainiya ukuwomelako mwi suwilo, wakapalamila sana kwe Leza swinya wakawa ni nsansa nkaninye.—Imilimo 20:35.

• Uzye e painiya mungamulondolola wuli?

• Uzye acani cino cikalenga wamwi ukuwombako wupainiya wa mpindi zyonsi?