Tajtol precursor itech español, kijtosneki se taltikpaknenkej akin kitapoua se ojti kampa amo akin nemi, uan ijkon akin kitojtokaj uelis ompa ojtokaskej. Uelis tikijtoskej ke Jesús katka se precursor, ta Dios kiualtitanik nikan taltikpak maj kichiuaki se tekit tein kiualkui nemilis uan ijkon kemej yeskia kitapoj se ojti tein ika taltikpakneminij ueliskiaj momakixtiskej (Mateo 20:28). Axkan tiktojtokaj ineskayo Jesús uan timochikauaj miak tonalmej uan ijkon tikinpaleuiaj taltikpakneminij maj mochiuakan imomachtijkauan (Mateo 28:19, 20). Sekin peuanij kichiuaj tein tiktokaytiaj tekit kemej precursor.

Tanojnotsa nochi tonalmej. Nochin tiitaixpantijkauan Jiova titanojnotsaj ika kuali tanauatilmej. Sayoj ke sekin kiyektalianij ininnemilis uan ijkon kiixtaliaj kichiuaskej tekit kemej precursor regular uan tekitiskej setenta horas itech tanojnotsalis sejse metsti. Yejua ika miakej tekitij sayoj tajko tonal. Oksekin kinixpejpenaj maj kichiuakan tekit kemej precursor especial uan kintitanij kampa okachi monekij tanojnotsanij; yejuan tanojnotsaj ciento treinta horas oso okachi itech sejse metsti. Akin kichiuaj tekit kemej precursor amo kitemouaj kipiaskej miak tomin uan takuaujtamatij ke Jiova kinmakas tein okachi moneki (Mateo 6:31-33; 1 Timoteo 6:6-8). Akin amo ueli kichiuaj tekit kemej precursor regular oso precursor especial, uelis kichiuaskej tekit kemej precursor auxiliar keman ueliskej, uan yejuan tanojnotsaj treinta oso cincuenta horas itech se metsti.

Kiolinia inetasojtalis tein kipialia Dios uan taltikpakneminij. Ijkon kemej Jesús, tikitaj ke taltikpakneminij motelneki maj kiixmatikan Dios uan tein kiixtalijtok kichiuas (Marcos 6:34). Sayoj ke tikpiaj taixmatilis tein axkan uelis kinpaleuis maj kipiakan se nechialis ika tein mochiuas satepan. Netasojtalis tein kinpialia taltikpakneminij kiolinia se precursor maj kikui itonaluan uan ichikaualis uan ijkon kinpaleuis maj kiixmatikan kuali tanauatilmej (Mateo 22:39; 1 Tesalonicenses 2:8). Nejin kichikaua itakuaujtamatilis uan ikuali uikalis iuan Dios, tein kichiua maj semi yolpaki (Hechos 20:35).

• ¿Toni tekit kichiua se precursor?

• ¿Toni kinolinia sekin maj kichiuakan tekit kemej precursor?