Ila ti “wa sungɔ lége” ndo fa zo ko la asi uzu ka ndo mɛ fanani la lo lɛkɛ lége ya azi mɛ ndɛ a ɔ ti da. Yezo ndo nga ma wa sungɔ lége, Nzapa tondó lo ge tise ya lo fa tɛnɛ mɛ ndo so na azi ko lo zi lége ti dungɔ lɛ ngɛ. (Matie 20:28) Ndɛ ko, ava lo ndo manda lo na gerengɔ na ngoi se alengbi ‘ti lingɔ ya azi ati ava lo.’ (Matie 28:19, 20) Ava lo mɛ ndɛ ndo li kwa mɛ e ili ya kwa ti sungɔ lége.

Wa sungɔ lége adu wa fangɔ tɛnɛ ti lá kwɛ́. Atɛmwɛ tɛ Yehova zu adu awa pangɔ nzɔ̃ pa. Kanda, ambɛni alɛkɛ du tɛ la ya ani li kwa ti wa sungɔ lége ti lá kwɛ́, ala ndo fa tɛnɛ hola 70 nzɛ kɔi kɔi. Uzu ti lingɔ ni ko, ala ndo sala kwa mɛ ta ndo tɛ ngoi ti la gba ma. Andó sala ala mɛ ndɛ ya ala ti awa sungɔ lége ti kotani ka ndo mɛ ta awa fangɔ tɛnɛ dazu gba ma, ala ndo fa tɛnɛ hola 130 bere a ɔ nzɛ kɔi kɔi. Awa sungɔ lége ndo sepala na du mɛ ala na ni, ala hĩnga nzɔ̃ni ya Yehova na lingɔ omɛ lo lengbi ti lingɔ na ndombali ani. (Matie 6:31-33; 1 Timɔte 6:6-8) Ala ko ta alengbi ti lingɔ kwa ti wa sungɔ lége ti lá kwɛ́ ma ko ala lengbi ti tingɔ awa sungɔ lége ti pɛ nduru ngoi ala ndo fa tɛnɛ hola 30 bere 50 se alengbi ya nzɛ kɔi kɔi.

Wa sungɔ lége ndo fa tɛnɛ ma wo ma na lo mɛ ya lo ye Nzapa lo ye nga azi. Nga ma Yezo, e ndo hũ nga ya azi gba zanga nzɔ̃ dangɔ be. (Marko 6:34) Kanda e hĩnga ye mɛ alengbi ti zangɔ ala na olo, pangɔ hɛ la ya ala lɛndɛrɛ anzɔ̃ lo mɛ na gangɔ. Songo la ndo to wa sungo lége ya lo gere na ngoi nga na ngunu tɛ lo so zangɔ afɔ̃ lo ka ya nyingɔ. (Matie 22:39; 1 Tɛsalonikɛ 2:8) Na loni la, loyengɔ tɛ lo ndo kpengba, lo ndo ti dã na Nzapa, lo ndo ti nga na dengɔ bɛ ma wo ma.​—Awa Pangɔ Kwa 20:35.

• Wa sungɔ lége adu na?

• Ye mɛ ndo to zo ya lo ti wa sungɔ lége ti lá kwɛ́ nɛ?